Gobernador Boekhoudt ta na Hulanda pa bishita di trabou

DEN HAAG - Gobernador di Aruba, Su Excelencia Alfonso Boekhoudt, e siman tras di lomba a haci varios bishita di trabao durante di su biahe di trabao pa Hulanda. Riba diahuebs 16 di september durante oranan di mainta Gobernador Boekhoudt a bishita minister plenipotenciario interino, Eddy Paris, y e anterior minister demisionario di Asuntonan Exterior, Sigrid Kaag. Mas atardi, riba mesun dia, Gobernador a bishita Nederlandse Vereniging van Journalisten. Riba diabierna 17 di september durante oranan di mainta Gobernador a bishita Secretario di Estado di Asuntonan Interior y di Reino, Raymond Knops. Despues parti atardi, Gobernador Boekhoudt a bishita director-general di Centraal Bureau voor de Statistiek, Angelique Berg. 

Riba dialuna 20 di september a continua cu e bishitanan di trabao. Primeramente Gobernador Boekhoudt a bishita presidente di Algemene Rekenkamer, Arno Visser, sigui pa un bishita cerca presidente di Commissie Koninkrijksrelaties, Jan Paternotte. Aki e miembronan di comision Jorien Wuite y Sylvana Simons tambe tabata presente. Despues di merdia Gobernador Boekhoudt a bishita Su Mahestad, Rey Willem-Alexander na Paleis Noordeinde. Seguidamente Gobernador a bishita vice-presidente di Raad van State, Thom de Graaf. E ultimo bishita di trabao riba dialuna tabata na Binnenhof cerca minister-president di Hulanda, Mark Rutte. 

Finalisando, riba diamars 21 di september Gobernador Boekhoudt tabatin un cita di almuerso cu directiva di Sociëteit De Witte na Den Haag y a bishita tambe e director di Centraal Planbureau, Pieter Hasekamp. 

Durante di e estadia na Hulanda di Gobernador Boekhoudt, Gobernador Interino, Su Excelencia Yvonne Laclé-Dirksz ta encarga cu su tareanan.

Potret: © Kabinet Gouverneur Aruba