Deportista Rechenell Statie: Un gobierno no por crea un sociedad fuerte su so!

ORANJESTAD – E hoben deportista Rechenell Statie cu a accidenta gravemente cu Bicicleta 4 aña pasa, a presenta un discurso dialuna atardi na occasion di e huramentacion di e 8 ministernan di gabinete Wever Croes II. E tema tabata “E vision pa mi pais” unda cu e ta toca e aspecto di bida cu e kier wak pa su pais. Gobierno a opta pa laga e papia, mirando e fe cu e hoben aki tin pa biba, cu a pone sigui cu su lucha pa ta bek riba pia. 

Awendia, e hoben ta bayendo scol bek, den rolstoel si, pero den proceso pa rehabilita. Segun e hoben, “nos tur tin cu duna di nos parti”. E ta sigui bisa cu un gobierno no por crea un Sociedad fuerte su so. Cada ciudadano mester duna di su parti pa logra esaki. E pandemia cu a dura mas di loke mundo a pensa, a siña nos cu ta hunto so nos ta logra. Progreso y stabilidad real ta depende di cada hende cu ta biba riba nos dushi baranca. Awo mas cu nunca, nos mester bin hunto pa mustra cu nos por logra yega na e Aruba cu nos kier mira bek. 

“Mi vision pa mi pais, ta bo vision pa nos pais. Nos vision mester ta comun” e ta sigui. “  Nos a pasa hunto den un pandemia cu pa nos tur tawata devastador. Nos tur a bay atras. Pero, nos tur a siña cu ta hunto so nos mester cana bay padilanti. Hunto so nos por crea prosperidad pa nos mes, pa nos pais. Nos tur tin un parti importante pa hunga den e progreso di nos pais. Y nos gobierno tin e deber y responsabilidad di promove maneranan nobo pa traha, facilita reformanan y monitorea e progreso cu cada ciudadano a aporta na dje”, Statie ta sigui bisa. Lesa e discurso completo AKI.