Pareha polis lo apela nan sentencia di prison contra nan

ORANJESTAD – Siman pasa e pareha P.y A. a apela nan sentencia caminda nan ta wordo haya culpabel di a menasa un persona cu arma di candela y drenta su cas sin permiso. Segun e matutino Bon Dia Aruba, a papia cu tanto abogado mr. Illes cu a representa e agente femenino A., como abogado mr. Lejuez cu a representa e agente masculino P. Ambos abogado a duna di conoce cu nan cliente a apela e sentencia di Corte di algun siman pasa. Pa loke ta e agente L., mr. Lejuez a duna di conoce cu e no sa si e agente lo bay apela. Te asina leu, ainda e agente L. no a apela mientras cu e siman aki ta deadline pa haci e apelacion. Si e agente L. no apela e sentencia, e ora ta bay ehecuta e sentencia cu ta encera cu e mester bay 16 luna cera den prizon y pa 5 aña largo e no por traha como agente di Polis. Ademas e lo mester paga e daño causa na e victima M.G. cu Hues a calcula na 5 mil florin.

ABUSA DI AUTORIDAD

Algun siman pasa, Hues den su sentencia, a bisa cu e agentenan a abusa di nan entrenamento y experencia di Polis, caminda nan a uza nan arma. El a mustra cu nan a bay haci un investigacion riba nan mes y a abusa di nan autoridad como Polis. Esaki a crea desconfianza den Polis. Hues a bisa cu Polis mester mantene orden publico. Door di e hecho aki a causa sentido di insiguridad den comunidad. Hues ta haya cu e agente L. tabata busca su brommer cu a wordo horta. El a convence otronan pa haci cosnan malo. Hues a tum’e na malo, cu a uza e otro agentenan di Polis. Pa loke ta e agente P., Hues a bisa cu e ta haya cu P. a laga su mes wordo uza y tabata activo. Hues ta haya cu como Polis, P. mester a distancia su mes. Ademas di esey, Hues a mustra cu P. a haci un delito anterior como Polis, pero e ta bolbe haci otro delito. Pa loke ta e agente A., Hues ta haya cu e tambe a laga su mes wordo uza.

DEMANDA DI DAN?O

Hues a mustra cu e victima M.G. a haci demanda inmaterial di 40 mil florin. Corte ta haya cu el a sufri daño inmaterial. Sinembargo no ta aproba e 40 mil florin sino 5 mil florin, como un adelanto, manera Fiscal a exigi.

CASTIGO

Hues basicamente a confirma e exigencia di Fiscal. El a condena L. na 16 luna di prizon y cu pa 5 aña e no por traha como Polis.Pa loke ta e agente P., Hues a conden’e na 18 luna di prizon y cu pa 5 aña e no por traha como Polis. Ademas Hues a confirma e exigencia di Fiscal pa impone e castigo condicional cu tabata colga riba su cabes pa un caso di maltrato. Hues a pone acerca e 40 dianan. Pa loke ta e agente A., Hues a conden’e na 12 luna di prizon y cu pa 3 aña e no por traha como Polis. Pa tur tres ta conta cu den nan tres nan mester percura pa paga M.G. 5 mil florin di daño inmaterial.

NO POR EHECUTA CASTIGO

Ta asina cu ora apela e sentencia, automaticamente e ehecucion no ta sigui. Tin cu warda te ora cu Hof di Corte Superior tuma un decision riba e caso. Bon Dia Aruba por a compronde cu ta un tactica a keda aplica pa asina haci e ehecucion di e sentencia mas largo, pa por lo menos 2 aña y asina e pareha lo por sigui cobra nan salario como Polis. E tactica ta encera cu si Corte Superior confirma e sentencia, nan ta apela pa Corte di Casacion cual lo wordo trata na Hulanda. Tur esaki ta tuma tempo, mientras cu e pareha lo por busca manera pa haya trabou na otro departamento y tambe prepara nan mes mas miho pa lo pio.