Rey: Bida den parti Caribe di Reino Hulandes a bira mas dificil debi na Coronavius

DEN HAAG – Bida den parti Caribe di Reino Hulandes  a bira mas dificil pa hopi hende danki na e Coronavirus. Asina Rey Willem Alexander a cuminsa bisa den su discurso (troonrede) na occasion di e apertura di Aña Parlamentario Hulandes conoci como prinsjesdag, cu ta e di tres diamars di september tur aña. Remarcable ta cu e biaha aki si, tabatin relativamente mas palabra dedica na e parti di Caribe Hulandes e biaha aki. Di e 2571 palabra cu tabata den e texto, e Rey a usa  93 palabra na nos region.

NOS SITUACION

Segun Rey, bida pa nos a bira mas duro debi cu coronacrisis a dal e economia di nos islanan hopi duro ‘debi na e caida enorme di turismo’. E Rey a ilustra e diferencia mesora entre loke nan ta considera Caribe Hulandes - Bonaire, St Estatius y Saba-, cu e otro islanan (Aruba, Corsou y St Maarten), unda cu a mustra cu e islanan BES a haya a medida di sosten economico igual manera Hulanda, mientras cu nos a haya ayudo, pero cu palabracion (lesa ‘condicion’:red) cu e sosten financiero duna, ta conduci na un economia cu ta mas resistente na golpi. “Den e combersacion riba e tema ey, ta importante semper pa busca consenso”, e Rey a sigui bisa. “Esey ta haci nos Reino completo, mas fuerte” e Rey a finalisa e paragrafo riba nos islanan. Mester remarca cu e consenso ey, ta uno sinembargo cu manera ta conoci, a wordo impone riba nos, manera cu prome minister Wever Croes a bisa repetidamente. 

PETER DE VRIES 

 E morto riba e periodista Hulandes Peter R. de Vries, segun Rey Willem Alexander a haya atencion den e discurso, y e acto violento ey ta conoce un punto mas abou atrobe den e guera contra crimen organisa na Hulanda. E pais ta bou di presion, y ta bin mas placa disponible pa bringa e crimen organisa aki. Esnan cu ta bringa pa derecho di estado, lo wordo protehi, segun e Rey. Lo inverti por lo menos 500 miyon den e causa aki. 

CORONA

A mustar cu e tempo nos dilanti, ta den cuadro di recuperacion di esnan cu den e tempo di corona a traha den cuido, tanto den hospital como den cuido. E Rey a manda palabra di gradicimento pa e grupo aki, hunto cu polis, militarnan y boa’s cu a asisti den e periodo aki. A mustra cu e economia ta recuperando y cos ta bayendo miho na Hulanda y cu e peor ta pa pasado. Lesa e text completo di e discurso AKI.