Hof a ordena Orden di Abogado apunta abogado pa Richi Danies pa su caso di apelacion

ORANJESTAD – Awe Hof a informa cu dia 11 di October proximo, e ciudadano conoci Richi Danies cu actualmente ta deteni na KIA, ta haya su libertad condicional. Mes momento Hof a ordena Orden di abogado pa apunta un abogado p’e, pa su caso di apelacion cu ta tuma lugar dia 15 di februari 2022. Esaki pasobra no tin abogado cu kier representa Danies. De hecho, sr Danies a presenta awe sin abogado atrobe debi cu e no tin confiansa den dje. Y ningun otro abogado kier represent’e. Esey a pone cu Hof a pone e obligacion aki. 

E CASO

Tabata na maart di e aña aki cu corte a haya Danies culpable pa varios cargo, pa cual e la ricibi su sentencia. Entre e cargonan, tabata 5 biaha destrui propiedad publico cu graffiti, pintando Aruba ta pedofiel, y 1 biaha pa opruiing, esta lanta pueblo pa violencia. Tambe e cargonan ta cu 1 biaha a menasa polis y a resisti contra su detencion. Y finalmente pasobra sr Danies a viola ley di Toque de Queda no menos cu 7 biaha. Huez na maart a sentencia sr Danies na 1 aña di prizon di cual 3 luna tabata condicional,  y cu 3 luna di prueba.