Atraco arma cu botin grandi riba trahado di compania di delivery

ORANJESTAD - Diaranson algo pasa di mey anochi a sosode un atraco arma na un cas na Calabas. Mesora central di polis a manda varios patruya na e adres aki. Na yegada enberdad polis a bin compronde cu ta trata di un atraco basta serio cu a caba di tuma lugar. Ta momento cu un empleado di un compania di delivery a yega su cas, y baha for di e auto di compania, e la wordo sorprendi pa un persona. E persona color scur, bisti cu jeans cu algo cora tapa na cara tabata arma cu un machete. E atracador ta cuminsa zwaai cu e machete varios biaha den direccion di e empleado y logra baha na awa cu mas cu 20 mil florin di e compania. Varios patruya di polis a cuminsa cu un buskeda pa e atracador. Y den e area di Colegio Felipe B. Tromp, un patruya a topa cu un persona cu ta cuadra cu e descripcion cu e victima a duna di e atracador. Pero na momento cu polis a bay pa detene e persona aki, el a sali na careda bay drenta den un cura di cas. Despues di basta buscamento den area, polis a termina e buskeda pero sin resultado. Atraco Team y tambe departamento tecnico a presenta na e cas pa mas investigacion. No ta prome biaha cu e compania aki ta bira victima di atraco. Algun aña atras atracadornan a atraca un empleado di e compania aki dilanti di Subway Paradera y a spray algo den cara di e trahador, unda cu ambulance mester a transporta e trahador pa hospital.