Periodistanan Andrade y Espinoza a hala nan apelacion aden pa caso di portafoon di polis

ORANJESTAD – E periodistanan Nelson “Speed” Andrade y Marko Espinoza a hala nan apelacion aden di e caso  Kinikini, osea asunto di portofoon di polis. Abogado di ambos periodista, esta mr Chris Lejuez a confirma awe mainta pa noticiacla cu enberdad nan a hala e caso aden. Riba e motibo di esaki, e abogado a bisa cu mester puntra nan dos. E caso di apelacion tabata poni pa tuma lugar mayan diamars, hunto cu e polis Rasmijn cu tambe a keda sentencia e tempo ey pa su envolvimento. Su caso si ta sigui mayan mainta 9:30am. Cu e cancelacion di e apelacion di e dos periodistanan, e veredicto di e caso bira defintivo. Esey kier men cu tanto  “Speed” Andrade y   Espinoza ta keda sentencia   di a comete heling intencional, (e hecho di kita, bende of tramita algo cu a wordo haya illegalmente) y malversacion intencional di un portofoon di polis, y a scucha informacion di polis y retransmiti esaki pa otronan scucha. 

E SENTENCIA 

Tabata riba 15 di juli na 2019 cu huez a dicta legalmente proba cu tanto Andrade como Espinoza a wordo haya culpable di e actonan menciona. Pa esaki a sentencia ambos persona conforme e peticion di fiscal, cu ta trabou comunitario pa ambos, esta 240 ora pa Andrade y 180 pa Espinoza. Si ambos no cumpli cu e sentencia, tin castigo di prison di 120 y 90 dia respectivamente. Ambos a apela e tempo ey.    

E CASO

Ministerio publico durante e caso a pidi castigo di 180 y 240 hora di trabou comunitario respectivamente pa periodistanan Espinoza y Andrade y 240 ora pa agente policial Rasmijn, den e caso di portofoon di polis, conoci como caso Kini Kini. Ta trata di e caso unda cu e polis ta sospecha di a malversa un portafoon di polis y e periodistanan di a usa e portafoon pa ricibi noticia di polis. Huez a suspende e caso pa almuerzo y lo continua despues cu defensa di e spspechosonan y palabra final

CARGONAN 

Despues cu Ministerio Publico a presenta e cargonan contra e respectivo sospechosonan, Huez a confronta e sospechosonan cu nan respectivo cargonan. Entre otro a confronta e polis Rasmijn con bin nunca a raporta e radio perdi. Segun e polis, e radio no tabata perdi, pero tabata ora cu e charger di radio di un di su coleganan a perde, a cuminsa busca esey y a bin nota cu di dje tambe tabata perdi. A confronta e sospechosonan cu e hecho cu tin informacion via e GPS (Global Positioning System) di e radio, cu ta ubike na cierto sitionan riba diferente fecha. Hunto cu declaracionan di un di e sospechosonan (e periodista Espinoza), Fiscal ta haya comproba cu e radio tabata den poder di e sospechosonan, y cu e confesion di Espinoza ta confirma e informacion di e GPS pa loke ta localidad di e portafoon y e charger. 

DESMENTI

E polis a desmenti rotundamente cu el a duna un periodista su radio, y cu e informacion di GPS no ta cuadra cu realidad. El a sigura huez cu for di momento cu el a haya e radio (December 2015), cu e tabatin e radio te na momento cu esey a wordo entrega bek na 2018. E ta haya hopi straño cu e GPS ta marca e loke cu OM ta sigura. Loke no a yuda Rasmijn, ta e confesion di Espinoza, cu a confirma cu e radio tabata den su poder, y cu riba orden ‘di mi hefe Speed’, e radio a wordo duna bek na Rasmijn, y cu Rasmijn a ricibi e radio bek. Algo cu e polis a desmenti. Andrade di otro banda, tambe ta desmenti di tabatin radio den su poder y cu e unico cos cu ta berdad ta cu e conoce Rasmijn, y cu nan ta amigo. Pero tur otro pregunta, no a haya contesta ya cu Andrade a usa su derecho di ‘keta keto’. Segun Andrade, e ta un periodista pa 30 aña y si e divulga informacion di su fuente(nan) e por wel di bay cas numa, basa riba e pensamento cu si un periodista divulga su fuente, e credibilidad di e periodista no tey mas y su trabou ta caba tambe. El a opta despues pa no papia mas y a dirigi tur otro pregunta, pa su abogado Chris Lejuez. Espinoza di otro banda, a confirma su declaracionan haci anteriormente na recherché. De hecho ora cu huez a puntra Espinoza, si e ta para tras di e declaracion, el a bisa cu si. Despues si, Espinoza a mustra cu durante un di su ultimo interogacionan (e di 4 di 6), el a wordo poni bou di presion, cu e menasa cu ‘si mi no declara, nan lo deporta mi mama y detene henter mi famia’. Huez a puntra pakico e no a informa di esey prome riba cual Espinoza no a duna contesta. Declaracionan di Espinoza a haci dificil pa e otronan, mirando cu e ta confirma no solamente cu e tabatin e radio, sino cu a construi henter un network pa por a sigui suministra informacionan obteni, na otro periodistanan. Algun di nan, ta wordo investiga ainda y lo bin dilanti despues di zomer, mescos cu un of dos polis. Por lo menos, segun fiscal.