Grupo di alumno di Colegio a tene protesta silencioso pa reglanan nobo di bisti

ORANJESTAD – Un grupo di studiante di Colegio Arubano na Playa diabierna a mustra nan mal contento den forma di un protesta ‘silencioso’ pa motibo di reglanan ‘nobo’ impone door di directiva di scol, pa cu e forma di bisti na e scol. Pa medio di un carta, a mustra kico ta nan problema y cu nan kier un solucion pa esaki. Entre nan, cu a prohibi pa bisti un hoodie (sweater cu capuchon), cu no tin logo di e scol, y tambe cu short y otro paña pa haci gimnasio, mester ta adecuado y solamente segun regla di scol. E alumnonan ta contradeci e reglanan indicando cu e cambionan no tabata conoci pa nan inicialmente debi cu a usa un Plataforma (facebook) cu no tur hende tin acceso na dje, y di dos, no tin logica pa cu e cambionan impone. "Nos tin necesidad pa un clima di scol den cual nos por ta hoben. Nos no kier tin e sentimento cu siendo un hoben ta un crimen" nan ta bisa den un carta. Nan kier tin participacion den cierto decisionan y ta spera cu nan protesta ‘silencioso’ lo tin atencion di e directiva di scol.