Age Bakker (CFT): ‘Mester elimina retraso den pago na SZV i APS pronto’

PHILIPSBURG – Sint Maarten a cumpli cu e deadline di januari pa aproba su presupuesto di 2015. Cft ta conclui sinembargo cu no a tene tur recomendacion duna riba e concepto di presupuesto na cuenta. Asina e organo consultativo financiero ta raporta awe publicamente. Segun Cft, e montante presupuesta di ANG 445 miyon como entrada ta mas halto cu e ANG 426 miyon recomenda, ainda no a elimina e retraso den pago na SZV i APS cual ta existi pa basta tempo caba, i no a compensa deficitnan di e añanan anterior. Cft a tene reunionnan constructivo cu gobierno con ta bai resolve e sobra puntonan di atencion aki.

CFT 

Colegio di supervision financiero (College financieel toezicht - Cft) a bishita Sint Maarten dia 23 i 24 di januari, loke por cierto tabata e prome bishita na Gabinete Gumbs. E Colegio a reuni cu Gobernador, Prome Minister interino, Minister di Finansa, Conseho di Minister i e Comision Fiho di Finansa di Parlamento. E topiconan prinsipal cu a keda discuti tabata e resultadonan di e presupuesto di 2014 i follow-up riba e recomendacionnan di Cft riba e concepto di presupuesto di 2015. Gobierno di Sint Maarten tin tempo te 2 di mart pa mustra Cft cu e puntonan di atencion cu a sobra den e presupuesto di 2015 lo keda atende na tempo i den un forma corecto, i cu e presupuesto ta cuadra cu e stipulacionnan di e Lei di Consenso di Supervision Financiero.

 PRESUPUESTO 2014

Gobierno a informa Cft cu datonan preliminar di Gobierno ta indica cu e entradanan di 2014 lo yega na un montante di ANG 430 miyon. E presupuesto ta indica un défisit modera di mas o menos ANG 8 miyon. Cft ta warda e cifranan final pa un analisis mas aleu.

PRESUPUESTO 2015

E presupuesto 2015 a keda aproba pa Parlamento i firma pa Gobernador fin di januari, na tempo ainda prome cu e deadline pospone di 31 di januari a pasa. Cft a indica tres punto di atencion pa cu e presupuesto ei. Na prome luga e entrada a keda proyecta na un nivel di ANG 445 miyon, loke ta mas halto cu e resultadonan di añanan anterior. Na di dos luga no a elimina e retraso den pago di aproximadamente ANG 200 miyon na principalmente SZV i APS ainda, contrali na compromisonan hasi anteriormente. Presidente di Cft a ripiti su preocupacion tocante di e punto di atencion pendiente aki. Na di tres luga decisionnan di for di 10-10-10 a acumula te un total di aproximadamente ANG 55 miyon, loke mester keda compensa. Cft a manda su conseho riba e presupuesto aproba di 2015 pa e minister di Finansa, kende awor tin te 2 di mart pa reacciona riba e recomendacionnan di Cft. A discuti tocante di posibel solucion durante di e reunionnan cu Gobierno. Gobierno lo entrega documentacion pa sostene e crecemento di entrada calcula riba ANG 15 miyon. Cft ta monitor realisacion di e entrada riba e prome cuater lunanan di 2015 pa determina si e crecemento aki ta hustifica. Pa loke ta trata e retraso den pago na SZV i APS, a acorda cu lo paga esaki prome cu fin di mei. Cft lo revisa e resultadonan durante di su proximo bishita na juni i lo discuti e compensacion di e deficitnan di e añanan anterior.

ASERCACION DI MAS AÑA

Sint Maarten ta preparando un documento di vision di mas aña pa hisa entrada i realisa un surplus presupuestario entrante 2016, pa compensa e deficit nan di e añanan anterior. E documento ta consisti di cuater parti: un programa di desaroyo economico, reorganisacion di oficina di impuesto, adaptacion di leinan di impuesto, i un programa di subimento di entrada i bahamento di gasto. Cft ta aplaudi e acercamento di mas aña aki. E Colegio a conseha Gobierno pa envolvi un autoridad externo independiente pa revisa e plannan i brinda un stempel di aprobacion como experto. Esaki ta hisa confiansa tambe serca e publico i lo mester atrae inversionista priva, ya cu Gobierno no por ehecuta e plan aki su so.