CBA ta alerta cu no por bende Banco di Caribe Aruba NV sin nan aprobacion

ORANJESTAD – Banco Central di Aruba tin cu duna aprobacion pa benta di Banco di Caribe Aruba NV wordo bendi. Asina e instituto financiero a bisa diahuebs, reaccionando riba e anuncio di Banco Central di Corsou y St Maarten. Cu esaki ta mustra cu no ta ‘asina asina’ e banco na Aruba, por wordo bendi. Mientras cu BCA ta bisa di a tuma nota di e comunicado, e ta bisa tambe cu ‘ta bon pa informa cu conforme cierto articulo (art 17 lid 1), ta prohibi pa un persona fisico of huridico adkiri un participacion cualifica den un entidad di credito sin e consentimento previo di CBA’. No ta conoci kico lo ta e siguiente paso aworaki. Click AKI pa lesa e comunicado completo di Banco Central di Aruba (CBA) riba e tema.  

E BENTA 

Tabata apenas un dia pasa, esta diahuebs cu Banco Central di Corsou y St Maarten (CBCS)a haci e anuncio cu Banco di Caribe N.V. (‘Banco di Caribe’) lo a ser bendi cu United Group Holdings B.V. (‘United’).  United Group Holdings BV ta di e conocido comerciante Gregory Elias, cu ta managing director hunto cu Richard Sietse Mijnheer. E benta lo a inclui tur actividad bancario di Banco di Caribe na Corsou, Aruba, Boneiru i Sint Maarten, como tambe e actividadnan di seguro i inversion di Van der Lubbe Assurantiën N.V., Bancarib Real Insurance Curaçao N.V. i BdC Investments B.V.   E acuerdo di benta segun CBCS a keda firma dia 11 di september 2021 pa e bendedo, cu ta Ennia Caribe Holding N.V. (‘ECH’), representa pa Centrale Bank van Curaçao en Sint Maarten (‘CBCS’) i di otro banda pa e cumprado, United. ECH ta e empresa matris di grupo Ennia. United ta un empresa di servisio financiero reconoci, activo entre otro na Corsou i na seis diferente pais Europeo, incluso na centronan financiero manera Amsterdam, Londres i Luxemburg.   Potret cortesia di Foursquare