Ursell Arends: Ministerionan di RAIZ lo no tin coordinador

ORANJESTAD – E ministernan di partido RAIZ lo no tin coordinador. Esey ta loke e lider di partido y futuro minister Ursell Arends a bisa como primicia den e programa Noticiacla LIVE diahuebs anochi na periodista Tito Laclé. “Nos ta bay traha bek den e aparato publico. Nos lo haci uso di e directornan di e dienstnan, pa nan ta e conseheronan” sr Arends a bisa. 

UNICO STAFF

E unico staff cu e ministerionan lo tin, ta secretarial cu lo haci e parti administrativo, y tambe e parti huridico y politico. Esaki ta conforme e regla nobo di e gabinete anterior di tin maximo 25 empleado. “Nos lo zorg pa mantene nos mes bou di e cantidad eynan tambe” sr. Arends a bisa. Segun Arends, un persona ta wordo usa como coordinador den e ultimo añanan, den forma di saca nan for di cierto departamento y despues nan ta traha pafor di e aparato publico. 

PARTNER DI COALICION SI POR TIN COORDINADOR

A puntra sr Arends si mientras nan no tin coordinador, si nan ta ok cu nan partner di coalicion, e partido MEP, si tin coordinador. “Esey ta keda na nan” sr Arends a bisa. “Nos kier set un standard di con nos ta bay traha y duna e balor na e director di e diensten. Nos ta paga nan hopi placa y mi ta kere cu ta bira ora pa duna nan e balor” sr Arends a bisa.