Recompensa pa dunado di informacion caso Wiels

WILLEMSTAD – Ministerio Publico di Corsou ayera a ofrece un recompensa pa e dunado di informacion riba e caso Magnus. E informacion oficial ta bisa cu fiscal mayor di Ministerio Publico (OM) di Corsou a dicidi pa pone disponibel un recompensa na e persona of personanan cu ta pone OM riba e caminda pa rastrea placa cu lo a wordo paga pa asesina Wiels dos aña pasa, y pa confisca esaki. E altura di e recompensa ta 50 % (cincuenta porciento) di e plaka ku finalmente keda confisca a base di e tip(nan). Mester por determina cu ta placa cu a keda paga pa e asesinato. Esnan cu tip por tuma contacto cu polis via e liña di telefon anonimo 108 (na Corsou).

KICO A PASA

Dia 5 di mei 2013 a mata Helmin Magno Wiels na pier di Marie Pampoen. Elvis.R.Kuwas a keda sentencia pa medio di veredicto di 29 di augustus 2014 pa e asesinato aki. Den e veredicto huez a stipula cu Kuwas a ricibi pago pa e asesinato aki. E veredicto aki a keda confirma dor di Korte di Apelacion den su veredicto di 20 di februari 2015.

INVESTIGACION

Den e investigacion Maximus ta investigando entre otro ken a duna ordu pa e asesinato. E sospecho ta cu esnan cu a duna ordu a recuri na dos entermediadó cu a uza E.R.K. pa ehecuta e asesinato. Tambe tin e sospecho cu e dunadonan di ordu a paga un montante grandi na e dos Intermediadornan. E investigacion Maximus ta dirigi su mes pa e motibo aki tambe riba e fluho di placa rondo di e diferente sospechosonan.

Probablemente E.R.K. a ricibi djis un parti chikito di e total di placa cu a ser pone disponibel. Mayoria di e sobra placa a keda serca e entermediadornan. Den cuadro di e investigacion ta hopi importante pa determina serca ken e sobra placa a keda of a keda aloha actualmente.