A cera ‘Conchi’ te proximo aviso despues cu boto cu droga a kibra na e sitio

ORANJESTAD – Gerencia di Parke Arikok a informa cu e parti di Conchi, osea e piscina natural ta cera te proximo aviso. Esaki despues cu un boto a bolter y kibra den e area protehi aki y laga un desastre ecologico atras. Ta trata di e boto carga cu droga y gasoline cu a keda descubri un dia prome, y cu posiblemente tambe tin persona indocumenta ariba. Segun parke, nan ta asesorando e danjo ecologico y haciendo limpiesa di e area. Esaki lo tuma hopi dia prome cu e por ta acesible pa publico atrobe. Pa loke ta e restauracion natural, esaki por tuma lunanan si no ta anja. Asina e parke a informa riba nan pagina di Facebook. 

POLIS

Mientrastanto autoridad policial a confirma e incidente di ayera merdia, ora cu a descubri pida di boto kibra den e conchi, hunto cu gasoline y por lo menos 8 pa 9 saco blanco cu contenido ‘desconoci’, pero cu mas probable ta droga cu ta drief. Den un tas chikito preto di plastic, a haya tambe 2 telefon satelital y un GPS. A entrega esaki na coleganan competente di BFTO y UGC pa mas investigacion.