Total di 8 parlamentario 'nobo' lo huramenta diabierna mainta

ORANJESTAD – Un total di 8 Parlamentario 'nobo' lo huramenta diabierna mainta 9’or. Ta pone nobo entre comillas pasobra tin algun di nan cu tabata parlamentario caba den pasado y no ta exactamente ;'nobo'. Ta solamente cu nan ta bolbe drenta Parlamento y como tal mester bolbe huramenta. Esnan cu tin cu huramente, ta entre nan Parlamentarionan pa MEP Darlene Guedes, Alvin Molina (nobo), Setty Christiaans, Shailiny Tromp, Marco Berlis (nobo), Ady Thijsen y pa partido RAIZ  Misha Raymond y Raymond Kamperveen, ambos nobo ya cu nunca antes nan tabatin e funcion di Parlamentario. Nan ta drenta mirando cu nan ta reemplaza e 8 personanan cu ta forma parti di gabinete Wever Croes II entrante diabierna atardi. E otro parlamentarionan cu tey, no mester huramenta mas pasobra nan a huramenta caba na juli. 

GELOOFSBRIEVEN

Diahuebs mainta 9’or a tuma lugar e reunion publico pa trata e credencialnan di e parlamentarionan nobo, y tur a keda acepta, cu ta habri caminda pa gobernador huramenta nan diabierna mainta. Segun presidente di Parlamento Edgard Vrolijk, unabez cu nan huramenta, trabou ta cuminsa mesora pa trata e retiro di e candidatonan pa minister, pa nan na nan turno por huramenta e mesun dia pero den ora di atardi.