Lo bende Banco di Caribe cu United Group Holdings NV

ORANJESTAD / WILLEMSTAD –   Banco di Caribe N.V. (‘Banco di Caribe’) lo ser bendi cu United Group Holdings B.V. (‘United’).  United Group Holdings BV ta di e conocido comerciante Gregory Elias, cu ta managing director hunto cu Richard Sietse Mijnheer. E benta lo inclui tur actividad bancario di Banco di Caribe na Corsou, Aruba, Boneiru i Sint Maarten, como tambe e actividadnan di seguro i inversion di Van der Lubbe Assurantiën N.V., Bancarib Real Insurance Curaçao N.V. i BdC Investments B.V. Asina Banco Central di Corsou y St Maarten a informa diahuebs mainta pa medio di un comunicado. E acuerdo di benta a keda firma dia 11 di september 2021 pa e bendedo, cu ta Ennia Caribe Holding N.V. (‘ECH’), representa pa Centrale Bank van Curaçao en Sint Maarten (‘CBCS’) i di otro banda pa e cumprado, United. ECH ta e empresa matris di grupo Ennia. United ta un empresa di servisio financiero reconoci, activo entre otro na Corsou i na seis diferente pais Europeo, incluso na centronan financiero manera Amsterdam, Londres i Luxemburg. Lesa e comunicado completo AKI. Potret cortesia di Foursquare.