Minister Glenbert Croes lo sigui cu e vision di minister Wever pa cartera di energia

ORANJESTAD - Diamars 15 di juni, a tuma luga traspaso di Ministerio di Energia for di Prome Minister Evelyn Wever - Croes pa Minister Glenbert Croes cu lo ta encarga cu e portofolio aki durante Gabinete Wever - Croes ll.  Minister Croes a expresa cu e ta considera e vision cu actual Minister President a pone pa Aruba, e fundeshi riba cual e lo eherce su trabou. ‘Mi ta kere cu futuro di Aruba, futuro di nos yiunan y calidad di bida lo depende di e vision aki cu ta un vision pa “clean affordable energy”. Unda cu nos ta percura pa cumpli cu tur obhetivonan cu mundo a compromete su mes na dje.’ Minister Croes a sigui bisa cu su meta ta pa percura pa mantene e esfuerso en conhunto di e sector energetico di Aruba, pa por cumplli cu e propositonan aki.