Mike Eman: Reunion cu Van Zwol a logra progreso considerable

ORANJESTAD – Reunionnan siman pasa entre representantenan di gobierno di Hulanda, -lidera pa top ambtenaar Richard van Zwol-,  y di Aruba, -lidera pa minister Angel Bermudez-, pasa no a conduci na nada concreto atrobe, esta yega na un acuerdo riba e situacion financiero di pais Aruba. Di otro banda, Prome Minister Mike Eman a sigura NoticiaCla.com ayera cu ciertamente nan a haci progreso considerabel. Mes momento nos fuentenan a indica cu loke a logra palabra, ta cu lo sigui cu combersacionnan separa riba e ‘problema’. Cu problema, kier men e debacle con ta logra complace otro pa traha hunto riba saneamento di e finanzas di gobierno. Gobierno di Aruba kier mas ‘participacion’ y Hulanda ta sigui insisti cu simplemente mester pone College Financieel Toezicht, manera cu a haci na Corsou y St Maarten.

PROGRESO

Prome Minister Mike Eman den su comentario ayera pa NoticiaCla.com, tabata positivo riba e reunionnan di siman pasa. “Continuamente ta bayendo mas miho, y ta yega cada bes mas serca tambe di algun pensamento comun. Asina nos ta bay organisa e partinan di locual ta e maneho financiero publico” Eman a bisa awe mainta. Tambe ta papiando riba kico Reino su rol lo ta den cooperacion pa cu otro. “Riba tur e terenonan aki nos a haci hopi hopi progreso”. Riba e pregunta cu si gobierno di Aruba ta mas serca di un solucion for di e ultimo biaha cu a papia cu e top ambtenaar Richard van Zwol, e mandatario a bisa cu un sonrisa:” Cada dia nos ta yega mas serca si. Cada dia!” .

UPDATE RIBA PRESUPUESTO

Informacion cu NoticiaCla.com tin mientrastanto, ta cu e consehonan di e organo consultativo RvA riba presupuesto 2015 lo a keda cla y a keda entrega. Segun Eman ayera, e presupuesto 2015 ta uno cu ta mustra e liña cu a scohe pa yega na un presupuesto balansa pa 2018. “Nos ta premira un surplus e ora. Segun cu e economia ta bay creciendo, y e reformanan cu nos a bay ta introduci tambe den fondo di pension, nan ta duna resultado hopi cla y positivo den e presupuesto 15,16 y 18. “Nos ta wardando e conseho di Raad van Advies” Eman a bisa, no sabiendo cu esaki lo tabta cal caba. Segun e mandatario, a mustra cu Raad van Advies lo ta tardando mas cu esaki pasobra no ta solamente un aña sino multiple aña nan tin cu repasa. Pues nan mester di nan tempo pa haci esaki pa por duna conseho riba e ‘meerjarenraming’, pues con realisabel e ta. E ta un proceso nobo cu segun Eman, gobierno a introduci.

BISHITA VAN ZWOL

Tabata den un otro intento, cu e ‘superambtenaar’ di gobierno Hulandes Richard van Zwol a bishita Aruba siman pasa atrobe. E biaha aki e lo a reuni atrobe cu minister di finanza Angel Bermudez pa wak si e biaha aki si nan por haya otro riba e situacion di finanzas publico. Notable e biaha aki ta cu mientras cu NoticiaCla.com tabatin e informacion aki confirma, e resto di e informacion rond di su bishita, tabata hermeticamente sera y ‘masha secreto’. E unico informacion cu tabatin ta cu van Zwol tabata programa pa yega Aruba diahuebs siman pasa, pero no sa cu ken, ni pa cuanto dia. Esaki por ta ‘bon’ of ‘menos bon’ dependiendo di e protagonistanan di e combersacion, NoticiaCla.com a wordo informa. Y pa evita posibel ‘mal interpretacion of aire publico’, lo a dicidi pa haci e bishita aki ‘aun mas low profile’ cu ta posibel.

 COMPLICACION OF NO

For di declaracion di e mandatario di finanza di Aruba, Angel Bermudez, -dos dia prome cu e bishita ainda-, cos mester bay bon pasobra ‘ no tin hopi complicacion’. Sinembargo den e mesun rosea, ta di multiple biaha cu e ambtenaar ta topa e mandatario sin por haya otro. Manera NoticiaCla.com a splica caba , mientras cu Bermudez a sigura cu no tin ‘hopi discrepancia’, toch partidonan no por a haya otro ainda. Pero lo ‘sigui te ora cu haya otro’. Mientras cu van Zwol tabata purba pa logra un acuerdo cu Bermudez siman pasa, trabounan riba e presupuesto tabata continua. Bermudez a indica cu e siman aki posiblemente e presupuesto lo mester bay Staten pa asina e wordo trata den su prome fase, pa despues sigui cu esaki y pa fin di luna, comienso di otro luna e keda cla. Van Zwol tabata bin Aruba cu un mision, y e resultado di e reunion di siman pasa lo tabata di sumo importancia.  

ARUBA COMPARA CU GRECIA

Gobierno di Aruba ta compara su ‘negoshacion riba finanzas’ cu Hulanda awor, manera esun cu Grecia tin cu resto di Europa. Specificamente e minister di Finanza Angel Bermudez a bisa siman pasa dialuna ainda, usando palabranan manera ‘supremacia’ y ‘arogancia’ pa demostra su punto na NoticiaCla.com. “E (Grecia) ta confrontando un supremacia, caminda e no ta haya oido pa su propio circumstancia cu e ta aden, pa e haya un adaptacion di e palabracion cu a wordo haci cune den pasado”. Segun Bermudez, “ta parse cu (ta e) mesun sentimento mi ta aden cada bez”. “Bo ta haya bo mes enfrenta cada bez contra un forma di supremacia y te hasta bo por yame arogancia”, e mandatario ta sigui bisa di e forma con Hulanda ta purba impone riba Aruba. “Pero pa ami, esey no ta importante. Ta e parti final ta conta. Keda insisti, y persevera y pa cierto momento yega na un comprondemento”. Asina e mandatario rapidamente ta cambia e tono inicial, for di uno ‘brabo’ pa uno mas suave, indicando cu no obstante tur e obstaculo, e ta mira cu lo tin un solucion na final toch.

IMPONE CFT 

E problema segun Bermudez a splica NoticiaCla.com un biaha mas siman pasa, ta cu Hulanda kier simplemente ‘impone’ CFT riba Aruba, pasobra ‘e la funciona pa Corsou y St Maarten’. E problema segun Bermudez, ta e ‘comprondemento riba igualdad cu Hulanda. “Nos mester yega na un otro base huridico (enves di esun cu Hulanda tin cu St Maarten y Corsou), pero di palabracion, con e tin cu funciona pa cubri nos propio interes”. E ta admiti cu Aruba a pidi pa ayudo, pero pa sa cu nos ta bayendo den e rumbo bon. Nada mas. “Nos no ta pidi ningun cen, pa ningun hende no bin impone nada riba nos”, implicando cu door di Aruba no a fia cen di Hulanda, Hulanda no tin nada di impone riba nos. Algo cu segun Bermudez, Hulanda ta purbando di haci ainda.

BON INTERCAMBIO

Den mesun rosea sinembargo toch, Bermudez ta sigura cu ‘no tin hopi discrepancia di opinion’. Ta intercambiando y e boluntad tey di ambos banda y ta kere cu lo ‘yega na dje’. Ta spera so, cu nada no wordo imponi pero a base di consenso y igualdad entre dos pais. Aruba no tin nada contra supervision, ya cu ta algo normal e internacional. Atrobe e ta uza e formula Troika, unda cu tres instancia ta controla otro, manera na Europa, banco central europeo, IMF y mercado comun europeo. Tur ta formanan cu e control y supervision mester por funciona.