Edgar Vrolijk: Ady Thijsen mes ta bira Parlamentario

ORANJESTAD – E misterio ta soluciona: Ady Thijsen mes ta drenta Parlamento, cu ta pone cu no ta necesario mas pa sr Ricky Hoek drenta na su lugar. Awe mainta presidente di Parlamento Edgard Vrolijk a confirma pa noticiacla cu sr Thijsen mes ta drenta. Cu e confirmacion di sr Thijsen, e lista di candidato ta completo. Esnan cu ta drenta awor pa MEP lo ta Hendrik Tevreden, Arthur Vallejo, Edgar Vrolijk, Darlene Guedes, Alvin Molina, Setty Christiaans, Shailiny Tromp Lee, Ady Thijsen y Marco Berlis. Esnan cu tin cu huramenta di nobo ta bira e ora sr Ady Thijsen, Darlene Guedes, Setty Christiaans, Alvin Molina, Shailiny Tromp Lee (cu ta bira lider di fraccion), y Marco Berlis (cu ta drenta ya cu Sue Ann Ras a gradici pero a opta pa no drenta).  

CAMBIO

Tabata diadomingo ainda cu lider di partido y actual prome minister Evelyn Wever den e programa Noticiacla LIVE a bisa cu a opta pa sr Thijsen haci un otro trabou cu no ta Parlamentario y lo wordo miho sirbi eynan. Algo cu sr Thijsen mes lo a bisa segun e mandatario. Pero awor toch sr Thijsen ta drenta Parlamento. Sr Thijsen tabata presidente di Parlamento pero awor e posicion ey a bay pa sr Vrolijk.