WASHINGTON – Aunke cu cifranan a cuminsa baha di contagio di Covid19 na Aruba, nos isla ta sigui permanece riba e lista mas halto di paisnan cu tin contagio di Covid19 segun Centers For Disease Control (CDC), e ekivalente di DVG na Aruba. Mientrastanto awe CDC a bolbe añadi 10 pais riba a lista di paisnan cu ta nivel 4 di Covid19. Cu e lista aki, Mericanonan ta menos inclina pa bishita nos isla debi cu mester e.o. vacuna y of tin cierto restriccion pa bishita nos isla. Y e consecuenci Aruba a sintie mesora segun asosacionan di turismo manera AHATA, cu a raporta caida den reservacion hotelero. Aruba Tourism Authority tambe a nota caida den cifra di turista pa Aruba. Mientrastanto e paisnan mas recien cu tambe ta aparece riba e lista ta Grenada and St. Kitts and Nevis, Afghanistan, Albania, Belize, Israel, Lithuania, Mauritius, Serbia
ARUBA TA RIBA E LISTA VARIOS SIMAN
Manera por a spera na comienso di Augustus ora cu cifranan di Covid19 a conoce un aumento drastico atrobe debi na e variante Delta, e di dos siman di augustus caba Centers for Disease Control (CDC) y US State Department a pone Aruba riba e alerta mas halto possible (cora scur) di paisnan cu tin Covid19. Esaki ta bisa tambe cu e alerta ta desconseha tur Mericano di biaha pa Aruba y si mester bay, pa ta vacuna. Corsou tabata riba e lista caba algun dia atras, aunke cu mester bisa cu nan a wordo poni riba e lista ora cu nan situacion tabata mucho menos cu Aruba. Aruba ainda e ora tabata core ‘light’. Hopi na Corsou a cuestiona e ‘discrepancia ey’ unda cu pa 61 caso di diferencia, Aruba tabata miho para cu Corsou. E ‘alegria ey’ a dura poco ya cu manera cu e cantidad di casonan a aumenta e siman ey cu 4 dia largo cu riba 100 caso positivo, tabata cuestion di dia pa paisnan grandi manera Merca tambe actua y ‘label Aruba’ mas peligroso den cuadro di Covid. A bisa caba cu si Aruba mes no haci nada y lock nos down, paisnan grandi manera Merca mes lo cera nan frontera pa Aruba.
TEHERAN – Mientras cu tin informacion cu Israël a ataca Iran durante diabierna marduga, tur dos pais ta keto riba e atake aki. Iran ta bisa cu e la saca algun drone di Israël for di shelo, pero ta desmenti cu tabatin un atake di raket. Algo cu prensa Mericano si ta raporta. Iran no ta yama Israël como e culpable tampoco, dus tin hopi incertidumbre riba e atake aki. Recientemente Iran a haci un atake specifico y calcula riba Israël, y despues Israël a keda keto. Esaki ta un noticia den proceso.
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.