Abogado Hendrik Croes ta pasa timon di oficina pa su coleganan di oficina

ORANJESTAD – Conocido abogado mr Hendrik Croes a anuncia diamars cu e ta ‘pasa timon di oficina pa esnan cu a crece hunto cu’ne’. Esaki ta sosode despues di 55 aña di ta eherciendo su profesion di abogacia. Manera ta conoci, desde 1967 a transcuri casi 55 aña cu Hendrik S. Croes  ta eherciendo e profesion di abogado y mirando su edad cu ta avansando, el a habri dialogo cu su socionan desde comienso di 2021 y a participa na nan cu e ta desea di sali di e practica di tur dia den e trabao y cu e kier pasa e timon di oficina over pa esnan cu a crece hunto cun’e den e tradicion cu el a cuminsa na mei di 1970, despues di su tres añanan di stage. Su yiu mayo ta actual prome minister di Aruba y for di momento di su entrada den politica, contrincantenan continuamente a lig’e na e oficina, den forma negativo, unda cu a hasta cherch’e cu ne. E siman aki ainda el a bisa den un programa di noticiacla, cu el a percura pa crea un situacion rond di su mes, cu ta evita mas tanto posibel pa e tipo di ‘atakenan’ aki. 

TRAYECTORIA

Den transcurso di e añanan aki el a sali di abogacia pa eherce diferente funcion na Antias Hulandes como Minister di Educacion y Structura Estatal (1973-1975), di Husticia y Structura Estatal (1979-1981), di Preparacion di Status Aparte di Aruba, Salubridad y Vice Prome Minister (1984 -1985); y na Aruba Minister di Husticia y Deporte (1989 -1993). Tambe el a sirbi su pais den Comision di Shete (Biesheuvel) y Comision Banden met Brussel (Van Beuge).

E oficina a sigura cu hunto cu CROES WEVER RUIZ a ser prepara un programa di traspaso ordena pa informa e network di clientenan debidamente.

CROES WEVER RUIZ a manda un mensahe pa e fundador, y ta desea su fundador, kende ta yama su mes un activista den e profesion legal, un periodo trankilo y mereci pa e traha riba su memoires y dedica na su hobbynan di jardineria y tennis.