AZV ta introduci cambio den maneho di docter di cas

ORANJESTAD – AZV lo introduci cambionan pa den su maneho, pa prome biaha den su 14 aña di existencia. E cambio lo tuma lugar den luna di Maart y September. Segun e vocero Solange Tchong, durante AZV su añanan di existencia, semper a stimula e inscripcion di sigurado y su famia na un dokter di cas. E dokter di cas ta e prome liña di cuido. E dokter di cas ta of ta bira e persona di confianza, pa kende e pashent por papia y confia tur loke tin di haci cu su salud. Sinembargo, sa sosode cu e pashent ta hay’e enfrenta cu falta di comunicacion cu su dokter di cas, of tin ora tin un conflicto cu su dokter di cas.

PROME INTENTO

E prome intento di e pashent semper lo ta pa papia cu su dokter di cas y pa hunto yega na un solucion. A lo menos esey ta loke AZV ta stimula tambe. Pero no ta tur ora ta yega na un solucion. Consecuentemente e pashent kier cambia di dokter di cas. Pa mehora e proceso di cambio di dokter di cas y pa facilita e asegurado di AZV, AZV ta introduci cambio di dokter di cas den dos periodo di aña. Esta den e luna di Maart y den luna di September. Manera menciona, e prome intento semper ta pa e asegurado, den e caso aki e pashent, bay papia bek cu su dokter di cas pa yega hunto na un solucion. Pero ora cu pa cualkier motibo esaki no ta resulta, e ora e asegurado por keda trankil, ya cu e tin e chens pa cambia di dokter di cas den e luna di Maart y September, sin cu e mester duna ningun tipo di razon pa haci esaki.

CAMBIONAN NA CAMINDA

E proceso di cambio di dokter di cas ta como lo siguiente: E asegurado ta acudi na e dokter di cas di su interes. E ta puntra si e mag di haci cambio y inscribi cerca e dokter di cas. Si e dokter di cas, den e caso aki, dokter nobo duna OK pa inscribi, e ora ey e asegurado ta yena y firma e formulario di cambio di dokter di cas cerca e dokter di cas aki. E dokter di cas tambe ta firma como muestra di su aprobacion y e dokter di cas ta manda e formulario di cambio pa AZV. AZV ta procesa e cambio manera cu AZV ricibi esaki for di e dokter di cas. Despues e asegurado, esta e cliente di AZV ta haya un confirmacion di AZV cu e cambio di dokter di cas a tuma luga. Segun Tchong, e bentaha di introduci e proceso aki ta cu e asegurado awo tin dos periodo den cual e por cambia di dokter di cas. E asegurado no mester duna ningun tipo di splicacion pa haci cambio di dokter di cas y tur aña esaki ta sosode den e mesun periodo, esta den luna di Maart y September.