Croes: Contento cu Corte na Corsou a bay mas leu cu Aruba riba derecho di parehanan gay

ORANJESTAD – Tumando nota di e sentencia monumental na Corsou awe riba e tema di matrimonio di mesun sexo y e discriminacion contra esaki, ex parlamentario , abogado y activista ferviente pa e tema aki na Aruba mr Desiree Croes tabata hopi contento. E tabata e prome parlamentario abiertamente homosexual na Aruba.”  Hopi felis di mira cu huez na Corsou a bay mas leu cu huez na Aruba, y ta duna respet na e derecho humano di parehanan gay riba nos hermana isla” Croes a cuminsa na bisa noticiacla, ora cu e portal aki a acerca e abogado pa su reaccion. “ Nos posicion como grupo minoritario ta conoce un adelanto cu veredicto aki. Y ta motiva y inspira nos pa sigui cu e lucha pa igualdad. Mi ta manda un palabra di danki y pabien den nomber di nos comunidad aki na Aruba na e hereonan di nos comunidad na Corsou”, Croes a bisa finalmente.

HUMAN RIGHTS CARIBBEAN FOUNDATION

E fundacion na Corsou cu ta bringando pa e derecho di e grupo di LGBT+, mesora a saca un comunicado riba e tema. Loke ta interesante ta cu na e ultimo aliña, nan ta compara e sentencia cu esun di Corsou. Segun e fundacion, e sentencia ta uno sorpresivo cu Corte di Prome Instancia na Aruba na 2020 ainda tabata puntra si mester habri e matrimonio di mesun sexo mester por, ta algo cu cada pais mester contesta separadamente, teniendo cuenta cu e cultura y aspecto social di e pais. Segun e fundacion, cu e sentencia di awe, e parti ey awor tambe ta tras di lomba y no vigente mas. “E sentencia di Corte di Prome Instancia na Corsou pesey tambe ta un paso dilanti den e emancipacion di LGBT’rs y un victoria pa tur cu ta preocupa pa derechonan fundamental y igualdad. “Ohala e sentencia aki ta pone cu gobierno por desaroya leynan riba e tereno aki y por acepta e sentencia aki, den interes di tur esnan di e grupo di LGBT’s riba e isla” e declaracion ta finalisa bisando. Lesa e declaracion completo AKI.