Parlamento a eligi su presidente y vice presidente 'nobo'

ORANJESTAD – Parlamento di Aruba conforme ley, a eligi nan presidente y vice presidente pa e aña parlamentario nobo cu ta inicia e di dos diamars di luna di September.Cu 11 voto pro y 10 blanco, a scohe Edgar Vrolijk y Ursell Arends respectivamente como e presidente y vice presidente.  Den e caso aki sinembargo, e tabata un situacion poco inusual, mirando cu mientras cu e eleccion pa e presidente mr Edgar Vrolijk cu ta bay keda den su funcion, e persona cu a keda eligi como vice presidente esta Ursell Arends, ta uno temporal mirando cu el a keda apunta recientemente como un di e proximo ministernan di e gabinete Wever Croes II. Esey ta pone cu sr Arends lo ta un vice presidente pa un periodo di posiblemente apenas un siman, mirando cu e lo keda huramenta den e proximo siman como minister. Tambe ta interesante cu a eligi un di dos vice presidente den persona di Geoffrey Wever cu tambe a keda postula como un minister den e proximo gabinete. Pues Parlamento lo conoce un cambio di vice presidente ora cu e parlamentarionan nobo asumi nan tarea, unabez cu e ministernan nobo (cu actualmente ta parlamentario tambe), asumi nan tarea nobo.