John Every a bay sosega: Un Arubiano cu a comberti petroleo den carbon

Posted on 09/12/2021 7:40 pm AST | Updated on 09/12/2021 7:49 pm AST

ORANJESTAD - Den fin di siman a anuncia fayecimento di John Every na edad di 81 aña. E tabata un cara conoci den e industria di petroleo, cu a sa di hiba su conocemento y experiencia na varios parti di mundo y pa varios compania. Na Aruba e tabata un di e Arubianonan cu e puestonan di mas halto den e refineria. Na momento cu LAGO a cera, mundo no a caba p’e y a cambia su enfoke di petroleo pa carbon y a bolbe cosecha mes of mas exito compara cu su añanan den e refineria.

John Every a lucha pa e ultimo tres añanan cu su salud, pero cu finalmente a opta pa stop e bataya. El a bay laga atras su señora Rita y su yiunan Carmen-Louise, John-Henry y Jo-Ann. Tambe a bay laga atras su cuater nieto- y cuater nietanan cu e ta stima masha tanto. Remarcabel ta cu dia 15 di augustus ultimo, e feliz pareha di John y Rita a celebra nan 58 aña di bida matrimonial.

Ken ta John Every

John Roland Every a nace dia 30 di mei 1940 na Eagle Colony. E ta yiu di John Clarence y Carmen Paulina. El a gradua na St. Dominicus College na Playa na 1956 na nivel MULO y a sigui pa Hulanda pa ey logra su diploma na nivel HBS na Canisuis College na Nijmegen na ana 1959. Djey a sigui pa logra bira ingeniero kimico na Technological University na Eindhoven na aña 1962.

Su carera a start na cas

Bek na Aruba, John Every a cuminsa traha na Aruba Chemical Industries, unda el a crece te bira Senior Process Supervisor ll den e departamento di produccion asigna na e planta di Ammonia. Na aña 1970 el a start su carera na LAGO na Aruba, despues di a termina un trabou di ocho luna largo na Cartagena, na Colombia, como e “Plant Superintendent” na Amoniaco del Caribe, na e International Petroleum Company. 

Su carera impresionante na LAGO

El a cuminsa como Senior Engineer in Process-Fuels y despues a dun’e e proyecto di “pre-startup” di e “Hydrogen Plants” y a wordo promovi na tres diferente ocacion. El a bira “Process Foreman” na aña 1971, despues “Division Superintendent - HDS” na aña 1972 y na final como “Division Superintendent - Oil Movements and Shipping” na aña 1975.

Di Aruba pa Hulanda

Entre aña 1978 y 1980, John Every a hiba su casa Rita y su yiunan Carmen-Louise, John-Henry y Jo-Ann na Holland, unda el a ocupa e funcion di “Senior Analyst Esso Benelux” na Breda. Tabata un orguyo pa tende con a busca un Rubiano te for di Aruba pa ocupa un puesto asina importante pa EXXON te na Europa.

Su ultimo añanan cu LAGO

Ora a regresa Aruba na aña 1980, el a bin ocupa e puesto di “Division Head Crude & Products Coordination” na LAGO. Pero, no a keda te ey y a sigui crece den e refineria y consecuentemente a ocupa e puesto di “Manager Technical Department” entre 1981 y 1983. Na aña 1985, net prome cu Lago Oil & Transport Company a cera, John Every tabata “Manager Operations Programming, Shipping & Marketing”. Orguyosamente por menciona cu e tabata instrumental den cera un contract pa produccion di awa pa Aruba cu Dominica.

Di petroleo pa carbon

Na aña 1985, ora cu Lago Oil & Transport Company a cera su portanan, mesora el a wordo acerca pa Eduardo de Veer pa e bira “Vice President Logistics” di MetaCorp, pa nan compania Inter-American Coal Holding N.V. Ey John Every a sigui crece y na 1988 ela bira accionista di MetaCorp. Inter-American Coal Holding N.V. tabatin nan oficina, e tempo aya, na e di dos piso riba Wendy’s Boulevard, dilanti oficina di Douane na Playa. Nan tabata opera for di Latino America pa mundo. 

Nan tabata cumpra carbon na Colombia, y transporta cu truck riba un trayecto di 400 kilometer largo, te na Lago di Maracaibo unda ta almacena e carbon. Ora e bira hopi, ta haci uzo di barge pa transporta no menos di 60 mil ton di carbon for di den waf pa e barconan cu no por a mara na waf, pa nan por transporta e carbon pa Merca y Europa. E negoshi a cuminsa chikito pero na dado momento a haya consecion pa explota un mina na estado Zulia na Venezuela. Esey a haci cu tabata dispone di hopi mas carbon y e negoshi cu a start cu 60 mil ton a surpasa 3 miyon ton di carbon pa aña. E tempo ey a uni cu e companianan Chevron y Evans Energy pa yuda explota e minanan di carbon. 

Su ultimo añanan cu MetaCorp

Na 2008 a opta pa bende e compania di carbon y John Every a pasa pa bira consultant pa algun proyecto specifico cu MetaCorp, te na aña 2009, ora el a dicidi di baha cu pensioen. Asina mes, siendo un bon amigo personal di Eduardo de Veer, el a keda den hunta di comisario di MetaCorp te na aña 2018. Ta bon pa menciona cu, como cu e operacion di Inter-American Coal tabata mas tanto na Colombia, Venezuela, Merca y Europa, cu poco hende na Aruba tabata consciente di e exito di e compania. John Every a sa di hinca hopi tempo, esfuerso y dedicacion den e proyecto y hacie asina exitoso cu na dado momento a bira un di e exportadonan di carbon mas importante pa Merca y Europa for di e region aki.

 

 

 

  • Andrade: Abogado a conseha pa no apela sentencia riba caso di portafoon di polis

    Andrade: Abogado a conseha pa no apela sentencia riba caso di portafoon di polis

    ORANJESTAD – Riba conseho di nan abogado (mr Chris Lejuez), periodista Nelson “Speed” Andrade a dicidi cu nan no ta bay apela e sentencia contra dje di 2 aña pasa unda cu nan a keda sentencia pa asunto di portafoon di polis, den caso Kinikini. Y segun Andrade, nan tambe a dicidi cu no ta bay gasta placa na defensa mas, y lo cumpli cu e sentencia di haci trabou comunitario. Asina el a declara durante su programa radial Enfoke dialuna merdia. E la sigura durante e programa, cu e no a horta radio di polis y cu na su cas nunca nan no a haya radio di polis tampoco. Sinembargo, asina mes a sentencia e periodista. E no a atende e parti ey, cu no obstante e parti cu e ta sigura cu e no tabata envolvi, toch a haya un sentencia. E ta considera cu loke Ministerio Publico a haci cu ne, door di hasta detene 2 dia, inhusto y no a sconde su rabia contra e instancia aki. “Pesey mi no tin confiansa den Ministerio Publico” Andrade a bisa. El a confirma tambe cu mientras cu e tabata den su programa, el a haya un dagvaarding pa presenta como testigo den e caso cu si ta sigui contra e polis Rasmijn mayan diamars mainta 9’or y mei. 

  • DVG: Di cada 10.000 persona no vacuna, 16 a fayece di Covid19

    DVG:  Di cada 10.000 persona no vacuna, 16 a fayece di Covid19

    ORANJESTAD - For di cuminsamento di juli 2021 di cada 10.000 persona no vacuna, 16 a fayece di Covid19. Asina departamento di salud a informa dialuna. Segun DVG, desde cu e variante Delta a haci su entrada na Aruba, hopi lihe e variante aki a causa preocupacion ora ela plama causando un brote grandi di casonan di COVID-19. 

  • Casonan positivo di Covid19 ta sigui baha, pero mortonan ta sigui cay

    Casonan positivo di Covid19 ta sigui baha, pero mortonan ta sigui cay

    ORANJESTAD - Segun resumen di awe 34 persona a recupera y un total di 26 caso nobo di COVID-19 a keda registra di cual 3 ta no-residente. E cifranan aki ta representa un 'Positivity rate' bou di nos residentenan di 22%. E cantidad di casonan activo di COVID-19 pa awe ta  259 y cantidad di fayecidonan relaciona cu COVID-19 a aumenta na 159. Forsa na famia di e fayecido. Datos ta ilustra casonan nobo di COVID cu un average semanal di 25 caso pa dia y un averahe di 'positivity rate' semanal di 12% pa dia.

  • Cifranan diario di Covid19 ta kedando relativamente abou

    Cifranan diario di Covid19 ta kedando relativamente abou

    ORANJESTAD- 19 september 2021. Segun resumen di awe 32 persona a recupera y un total di 28 caso nobo di COVID-19 a keda registra di cual 8 ta no-residente. E cifranan aki ta representa un 'Positivity rate' bou di nos residentenan di 19%. E cantidad di casonan activo di COVID-19 pa awe ta  269 y cantidad di fayecidonan relaciona cu COVID-19 ta 158. Datos ta ilustra casonan nobo di COVID cu un average semanal di 24 caso pa dia y un averahe di 'positivity rate' semanal di 11% pa dia.

  • SIMAR di Aruba y USIBO y SIMABO di Bonaire a cera protocol di cooperacion

    SIMAR di Aruba y USIBO y SIMABO di Bonaire a cera protocol di cooperacion

    ORANJESTAD – Diasabra sindidato di maestro di Aruba SIMAR y USIBO (Union Sindikal Boneriano) a firma un protocol di cooperacion, cu ta encera solaridat y union, pa sostene y fortifica otro cu e proposito pa haci uzo di tur e conocemento, experiencia y fasilidadnan, sali den un forma optimal pa e clase trahador riba teritorionan di Aruba y Bonaire.

  • Arcade Aruba by Wind Creek a habri su portanan!

    Arcade Aruba by Wind Creek a habri su portanan!

    (ADVERTORIAL)

  • Powered by SETAR