Si Hulanda no duna Aruba e siguiente tranche, lo fia placa otro caminda!

ORANJESTAD – Si gobierno Hulandes (of CAft) no acepta e hecho cu gobierno di Aruba no ta dispuesto pa reduci 60 miyon florin den salud pa aña, tin chens cu Hulanda lo stop e ayudo financiero mesora, y esaki por sosode otro luna caba. Prome minister Evelyn Wever Croes contestando un pregunta diadomingo anochi durante e programa Noticiacla LIVE di noticiacla, a bisa cu si esey sosode, Aruba lo bay pa plan B,   esta fia placa otro caminda. Esaki tabata sra Wever su prome entrevista extenso despues di a forma e gabinete Wever Croes II recientemente.   

ARUBA NO POR CUMPLI CU EXIGENCIA DI HULANDA

Gobierno Hulandes y e colegio di supervision financiero di Aruba (cu ta conseha Conseho di Minister di Reino riba aspectonan financiero di Aruba) CAft recientemente ainda a exigi di Aruba pa e tene su mes na e palabracion di corta 60 miyon pa aña. Sinembargo, awor Aruba su gobierno ta bisa cu ehercicio haci ta mustra cu Aruba simnplemente no por corta mas cu 40 miyon, y como tal esey ta e mensahe cu ta bay duna Hulanda proximamente. 

HULANDA POR STOP AYUDO FINANCIERO 

Y e prome mandatario ta conciente cu esaki kier men cu Hulanda por para e siguiente tranche na October y tambe esun di fin aña. Si esey sosode, e mandatario a bisa cu e ora no ta keda nada otro pa bay bolbe fia placa otro caminda. Y segun e mandatario, esey ta permiti pa haci y cu tin placa pa haya. Pasobra a haci e pregunta, cu kico ta pasa cu si ta conta cu tin placa pa haya ora cu subi mercado, pero ta resulta cu no tin interes.