De Meza: Prome indicacion ta cu no por kibra e hedging contract di WEB

ORANJESTAD – Prome indicacion ta cu no por kibra e hedging contract di WEB riba fuel oil. Esaki e mandatario encarga cu energia Mike de Meza ayera a bisa NoticiaCla.com. E mandatario a sigura tambe cu e resultado di e ‘feitenonderzoek’ conduci riba e contract, lo keda presenta den e reunion di parlamento dia 4 di maart proximo. Aki lo por divulga mas informacion ariba. Ademas segun e mandatario, e ta purbando pa wak ‘kico lo por haci alsnog pa limita e restriction cu esaki tin pa pueblo’, refiriendo na e contracto. E huristanan ainda ta analisando e rapport pa wak pues, si por trece un cambio den e contractonan aki. “Ta dificil pa bisa awor caba kico ta e posibilidadnan” de Meza a sigui bisa.

OPCION RIBA MESA

Segun e mandatario, tin algun opcion cu a wordo poni riba mesa, cu ta studiando cu lo por duna poco alivio. “Mi lo tin cu contesta bo esey despues pasobra nos tin cu wake un tiki mas detaya cu e huristanan acerca” de Meza a bisa. E mandatario no kier a bisa ainda si esaki ta nifica cu por kibra e contracto. “Pasobra nos ta bezig ta wak esaki. Prome indicacionnan ta cu esaki no ta posibel (esta) pa kibra e contract”, e mandatario a sigui bisa. Y ta esey e mandatario ta studiando pa wak si esey enberdad ta cuadra. Tambe ta wak si por negocia un cambio den loke a wordo acorda pa toch trece un alivio cune. “Pero esey tambe ta prematuro, si mi bisa cu esey ta un hecho” de Meza a bisa.

CASI 100% GEHEDGED

E mandatario a admiti cu pe, hopi informacion cu e la lesa, tabata nobo pa loke ta trata e contracto. Tambe e mandatario a mustra cu e contracto ta ‘gehedged’ pa 90 pa 95%. Algo cu segun e mandatario, ta un decision cu e lo a tuma.

RAPPORT CLA PORFIN

Tabata net un siman pasa cu minister de Meza a confirma cu E ‘feitenonderzoek’ a keda cla. Diferencia siman pasa tabata sinembargo cu e no tabata sa e contenido ‘ainda’. “Nos ta bay haya chens di pasa door di dje awor prome” e mandatario a sigui bisa, pasobra ‘gobierno tambe tin su caminda pa cana y su obligacionnan cu e tin pa haci’. Y unabes cu e la cana su caminda, e lo presenta esaki publicamente pa tur hende sa kico a sosode y, -mas importante-, kico tin cu haci awo.

VERIFICA CONTENIDO

Segun de Meza, no ta djis ricibi e rapport di WEB y mand’e directamente pa parlamento. “Nos tin cu verifica y mira kico nos tin cu haci cu e resultado di e onderzoek. Pero sigur e ta bay parlamento tambe, pa sigui cu e reunion publico cu tabatin”. E mandatario ta referi na e reunion publico cu a wordo yama pa partido MEP algun siman atras, pero cu a wordo suspendi pendiente resultado di e investigacion interno cu a wordo haci.

MOTIBO DI INVESTIGACION

E investigacion mester a trece luz riba e motibo cu a sera e contracto di e forma cu e la ser sera, y tambe kico ta e consecuencianan si pensa pa anula esaki of modifica esaki. Manera ta conoci, WEB a sera un contracto di hedging (proteha compra di petroleo pa un periodo defini pa evita fluctuacion di tarifa) pa 3 aña, siendo cu e tarifa di fuel ta bahando drasticamente. Como tal e decision awor a resulta di ta uno malo, y ta evaluando si por eventualmente modifica esaki. Tambe e investigacion tin cu trece dilanti pakico a cera e contracto pa un periodo asina largo, siendo cu normalmente nan ta wordo cera pa un periodo mas cortico. E contract aki a bira topico di discusion politico serio, mirando cu e lo ta perhudicando economia di Aruba.