Presupuesto di pais Aruba 2022 lo wordo trata te januari 2022

ORANJESTAD – Presupuesto di pais Aruba pa 2022, lo wordo trata te otro aña januari. Asina minister demisionario Xiomara Maduro a bisa awe mainta riba su pagina social. E motibo di e tardansa (e presupuesto normalmente mester wordo entrega na Parlamento dia 1 di September di e aña anterior y trata prome cu comienso di e aña anterior) ta e.o. debi na e cambio di gobierno y e acuerdonan cu tin cu Hulanda, segun e mandatario ta pone riba su pagina. 

E PROCESO

E mandatario a splica cu e Presupuesto 2022 a wordo presenta na e proximo Ministernan di Gabinete Wever-Croes den un encuentro cu Minister di Finansa hunto cu Departamento di Finansa. “Den e reunion aki a duna un bista di e cuadro financiero y e puntonan di salida den cual ta tene cuenta cu e supervision financiero di CFT y e acuerdonan cu Hulanda” e mandatario demisionario a sighui bisa. “Na momento cu formacion ta tras di lomba lo sigui tratamento interno di e concepto di presupuesto 2022 door di Minister di Finansa cu cada Minister, sigui pa e decicionnan necesario den Conseho di Minister”. 

CFT y RvA

Despues e concepto lo cana e caminda di conseho serca CFT y Raad van Advies. “Una bes cu Gobierno ricibi e consehonan lo por haci e cambionan necesario pa asina e Ley di Presupuesto 2022 por wordo presenta na Parlamento di Aruba pa su tratamento. Esaki lo por tuma lugar mas tempran na januari 2022” e mandatario a bisa finalmente. 

CAft

MAnera ta conoci CAft no ta mucho contento cu e hecho cu gobierno di Aruba ta usando e eleccion recien y e pandemia actual como motibo pa tin tardansa den e proceso di e tratamento di e presupuesto. E presupuesto di e aña aki a keda aproba te luna di juni ultimo. Ora cu a puntra CAft si nan lo tin pasenshi cu e presupuesto proximo, mirando cu tin eleccion y cu e fecha di September ta ‘ey mes’, e presidente di CAft a bisa e momento ey cu ‘e tempo pa excusa a pasa’, y mas despues cu no por usa eleccion y pandemia como excusa. Esaki pasobra na Hulanda tambe tabatin eleccion y ey toch tur cos a keda cana normal, incluyendo tratamento di presupuesto.