KVK: Dispuesto pa colabora cu gobierno pa ‘Masterplan San Nicolas’

ORANJESTAD – Camara di Comercio y Industria (KvK) ta dispuesto pa colabora den un Masterplan pa San Nicolas. Asina e gremio comercial ta comenta via un comunicado riba e reunion cu nan tabatin cu ministro di turismo Otmar Oduber. Meta di e reunion, manera cu NoticiaCla.com a raporta for di diasabra caba, pa clarifica di ambos banda e reaccion di e mandatario riba comentario cu KvK a duna riba e plan pa crea un hotel di alrededor di 1000 camber y un shopping mall na Sero Colorado. E gremio a opta tambe pa  comenta riba e critica di e mandatario, cu Kvk lo tin problema interno di comunicacion, cu segun e mandatario, tabata e posibel problema pa e malcomprendemento entre su persona y e gremio.

SPLICACION EXTENSO

Ministro Oduber a duna un splicacion extenso di e plannan cu e tin pa Sero Colorado y Main Street na San Nicolas. Na e momentonan aki Aruba Investment Bank (AIB) ta terminando un plan pa caya grandi na San Nicolas, cu ta encera varios aspecto di conservacion di herencia cultural (edificionan cu balor cultural y e creacion di varios museo), cu por sirbi como catalisado pa revitalisacion di e centro comercial di San Nicolas. Camara di Comercio a duna su opinion den e cuadro aki caba, riba invitacion di AIB. Asina cu e rapport definitivo ta disponibel, KvK lo duna su comentario riba e totalidad.

PROYECTO BAHIA

KvK a ser informa cu e plannan hotelero pa Sero Colorado ta encera varios proyecto di hotel, banda di esun di Bahia, cu na tur lo trece alrededor di 2500 camber di hotel. E consecuencianan pa mercado laboral local, tanto positivo como negativo, lo mester ser analisa mas a fondo, na opinion di KvK. Tambe lo mester analisa e spin off cu e proyectonan por tin pa comercio local y eventualmente pone condicion na esaki.

BISTA DI KVK

Di banda di Camara di Comercio a duna un splicacion di e forma con KvK pa varios an?a caba tin un vision integral pa e problematica complica di henter San Nicolas, incluyendo e tereno di refineria Valero, e centro comercial di e ciudad, e area di Sero Colorado y e demas partinan di San Nicolas. KvK ta keda enfatisa e necesidad di un plan integral y total, hustamente pa percura cu desaroyo den tur sector ta cuadra cu plannan cu ta existi eventualmente den otro area. Tambe KvK a trece dilanti cu e tereno di e refineria ta hunga un papel importante, pasobra esey ta determina e posiblidadnan di desaroyo nobo canto di awa, incluyendo creacion di un downtown area nobo, cu un ‘waterfront’, algo innovador pa San Nicolas.

NO POR WARDA

Segun Kvk, Oduber a trece dilanti cu, pa loke ta e carteranan cu e ta maneha, e no por warda riba e desaroyonan cu tin di haci cu e refineria, pero ta haci awor caba loke segun su opinion ta lo corecto pa actua riba awor caba. Ambos partido a conveni pa envolve KvK mas den duna conseho y opinion den desaroyo di plannan pa futuro. Di su banda KvK ta dispuesto pa haci esaki, con tal cu ta respeta ora cu KvK ta haya necesario pa mantene su propio punto di bista, tambe ora esaki no ta cuadra cu vision di otronan.

FALTA DI MASTERPLAN COMPLETO

Finalmente, KvK ta constata cu no ta existi un Masterplan total pa henter San Nicolas, pero tin plannan hopi avansa caba pa revitalisa Main Street y pa construi varios hotel den area di Sero Colorado, di cual awor aki esun di Bahia Principe ta den fase di elaboracion di un asina yama MER (Milieu-effect rapport). KvK ta expresa su disposicion pa yega ainda na un plan total (Masterplan) pa San Nicolas y lo cuminsa acerca diferente ministerio pa haya un bista riba e totalidad di aspecto cu mester tuma na cuenta.