Entrada hudicial awe pa caso di malversacion di ex parlamentario

ORANJESTAD – Awe mainta personal di tanto Landsrecherche como Recherche Samenwerkings Team (RST) a haci un entrada hudicial na un cas na Papayastraat relaciona cu e caso Diamante, cu tin como sospechoso principal e ex parlamentario y lider di partido politico POR, esta Alan Howell. Ta trata di e caso unda cu fondonan lo a wordo malversa y cu mester di claridad. Vocero di Ministerio Publico Ann Angela a confirma cu e entrada ta relaciona cu e caso Diamante, pero a bisa mesora tambe cu no tabatin detencion, sino solamente e entrada hudicial.

INTEROGACION

Tabata na April di e aña aki cu e lider di partido politico  a keda scucha   oficialmente como sospechoso den e caso di malversacion di fondo. Algun siman prome sr Howell a keda informa cu a pone beslag riba un di su cuentanan bancario y un cuenta di e fundacion di e fraccion POR den Parlamento, basa riba sospecho di malversacion di fondo. Semper e ex parlamentario a para ariba cu e ta inocente y cu e no a haci nada malo. Potretnan cortesia Telearuba.