MEP ainda no kier confirma nan 6 candidatonan ‘nobo’ cu ta drenta Parlamento proximamente

ORANJESTAD – Mientras cu e candidatonan ‘nobo’ pa partido RAIZ ta conoci cu lo drenta Parlamento proximamente pa reemplaza e #1 y # 2 respectivamente, e candidatonan cu ta drenta na lugar di esnan cu ta birando minister, si no ta conoci. “Nos tin cu caba rond esaki af ainda” e premier y lider di partido Evelyn Wever Croes a bisa noticiacla diahuebs durante un conferencia di prensa. Esnan cu ta parlamentario awor y cu ta bira minister, ta Wever, Xiomara Maduro, Dangui Oduber, Endy Croes y Glenbert Croes. Pa nan 6 tin 6 ‘nobo’ cu tin cu drenta. Di esnan cu tey caba, esun cu ta keda sigur ta Edgar Vrolijk mirando cu e ta bira presidente di Parlamento proximamente. Fuera di Vrolijk, esnan cu ta parlamentario caba, ta Hendrik Tevreden y Arthur Vallejo. Y mirando cu a anuncia cu sr Guilfred Besaril ta esun cu ta bay Hulanda bek como minister plenipotenciario, ta keda e siguientenan pa asumi nan funcion, cu ta Alvin Molina, Shailiny Tromp, Ady Thijsen, Setty Christiaans, Darlaine Guedez, y Sue Ann Ras. Esey ta si sigui e secuencia di e lista. Pa tin cambio, cada un di e candidatonan aki mester ‘bedank’ pa e funcion pa por sigui pa e siguiente riba lista.