Minister ta reacciona contra CAFt: No ta hustificabel pa corta den cuido medico!

ORANJESTAD – Semper a para firma cu den pandemia no ta hustificabel pa corta den cuido medico. Asina minister demisionario di Salud Dangui Oduber a bisa noticiacla como comentario riba e hecho cu e colegio di supervision financiero (CAft) e siman aki ta sigui reclama cu no ta cumpliendo cu e cortamento di gasto den AZV manera cu a keda palabra. E colegio a duna su comentario recientemente riba e Uitvoerings Raportage di e di dos cuartaal. Hulanda a exigi di Aruba pa corta 60 miyon den cuido medico. Pero gobierno ta mustra cu nan ta logra reduci solamente menos cu esey. Algo cu CAft no ta di acuerdo cu ne.

REACCION MINISTER

Segun e mandatario a sigui bisa, y recorda cu ta for di anja 2020 gobierno y su ministerio ta den discusion cu Caft y tambe secretario di estado Knops riba e recorte di 60 miyon florin pa anja den cuido. “ Semper nos a keda para firme riba e hecho cu awor den pandemia no ta hustificabel pa bai corta hustamente den cuido medico” e mandatario a bisa. “ Nos ta consiente si cu pa por garantiza e sostenibilidad di e fondo di AZV cu ta bao hopi presion muy especialmente durante e pandemia, tin ehercicionan mester wordo haci pa por reduci gasto. Nos a te hasta bisa cu laga e pandemia pasa y hunto cu nan pensa con ta e mihor manera pa reforma cu ta haci menos dolor” e mandatario a sigui bisa. 

ESFUERSO

Segun sr Oduber, tur esfuerzo a wordo haci pa por convence CAft y secretario di estado Knops riba tur esaki. Ministerio di salud a forma un comision nacional di cuido pa delibera riba opcionan cu por existi pa den termino largo por garantiza cu e fondo di AZV ta keda sostenibel. “ Lamentablemente loke e comision a conclui y trece dilanti ta cu mester introduci un sugar tax of busca manera nan pa aumenta entrada pa azv cual esey no tawata parti di e tarea di e comision”. E problema cu e mandatario ta wak ainda, ta cu Gobierno di Aruba ainda ta dependiente di financiamento di gobierno di Hulanda teniendo cuenta cu e variante delta a afecta nos recuperacion di nos turismo y economia. “Nos lo mester fia basta miyones ainda e anja aki y esaki ta pone nos den un situacion complica y dificil.

E tema aki no ta uno facil , e ta un reto grandisimo y uno cu sacrificio pa por cumpli cu ne”, e mandatario a finalisa bisando.