Schwengle: Sindicato no sa consecuencia si para proyecto hospital

ORANJESTAD – Minister di Salud Alex Schwengle ta lamenta cu sindicato di hospital ABV no a tuma contacto cune riba e topico di ‘operatie kamer’ nobo. Asina e ta reacciona riba e pensamento di e sindicato cu a pidi pa para e proyecto di renobacion di hospital, pa investiga e fayo den e asunto di operatie kamer nobo. “Esey ta e problema cu tin aworaki” Schwengle a bisa, refiriendo na e hecho tin cu falta di comunicacion. Y entre minister y sindicato, aparentemente esey tambe ta e caso. Segun e mandatario, por para e proyecto, pero esey no ta un opcion aworaki. E sindicato recientemente a mustra nan precupacion cu e problema y a sugeri pa ta miho haci un investigacion prome cu continua cu e proyecto. Algo cu e mandatario ta bisa, cu no por. 

PENSAMENTO ERONEO

E mandatario ta sigura cu e pensamento di e sindicato no ta cuadra y ta indica tambe cu e sindicato no tin tur informacion y no ta na altura di tur e forzanan tras di e proyecto, y pakico tin tanto pura. “Si e (sindicato) bisa esey, e ta nifica cu e no ta realisando cu MediRisk a buta un presion riba nos, (e compania cu ta sigura e hospital), y a bisa ‘liever gister dan vandaag, e ta buta presion hopi grandi riba mi persona, cu e operatie kamer mester bin cla mas pronto cu ta posibel” Schwengle a sigui.

TEMPO NO TIN

Para e proceso y haci un parlementaire enquete por, y e mandatario no tin problema pa esaki tampoco. “Pero e ora bo ta bay core un peliger hopi grandi” Schwengle a sigui bisa. E problema ta bira e ora cu seguro no ta cubri e operacionnan mas, y esey ta crea un problema mucho mas grandi pa nos. “Na momento cu bo OK no ta sigura mas, ta nifica cu bo tin cu cere, of cera e cambernan of laga un camber habri. E ta nifica retraso den bo operacionnan, y bo tin cu manda hende afo pa bo opera”. E parti porta mas importante ta cu bo tin cu raporta esaki na bo aerolinea internacional cu ta bula pa Aruba. Nan ta bisa e ora cu bo no ta bin. “Pues e luho di tempo, mi no tin” e mandatario a sigui bisa.

PROBLEMA DI OK

Tin un problema cu a conduci cu awe tin un discusion riba e tema di operatie kamer di hospital. “Esey ta berdad” minister di salud Alex Schwengle a confirma na NoticiaCla.com. Segun e mandatario cu tin e cartera aki, ta hospital su directiva mes a haci un mal calculacion y awor esey ta saliendo e (hospital) mas caro den e proyecto di renobacion di e hospital. Y esey ta inclui entre otro e operatie kamer riba cual tin tanto discusion. Un discusion cu a haya un tinte politico unda cu varios partido politico manera Democracia Real y UPP) ta cuestiona e asunto, y hunto cune, e mandatario pa su envolvimento.

DECISION DI NO RENOBA

Segun e mandatario, e directiva bieu di OK (Operatie Kamer) ora di negosha na 2010 ki parti di hospital ta renoba, a dicidi cu no mester renoba OK pasobra esaki a wordo haci algun tempo atras. E mandatario a bolbe enfatisa cu ta hospital mes a dicidi esey. Ningun otro hende. "Hospital mes, ‘y e ta documenta ", ta esnan segun e mandatario cu a dicidi cu no ta renoba e parti di intensive care y operatie kamer. A resulta despues cu e ‘inschatting’ tabata robes, y cu e calidad di e parti fisico di e.o. e operatiekamer no ta adecua. A haci un analisis aña pasa augustus segun e minister, cual  inspectie di salud a tuma pa su encargo prome, cu a pase pa TNO (Nederlandse Organisatie voor Toegepast Natuurwetenschappelijk Onderzoek), manera cu ta e regla di inspectie na Hulanda tambe . Despues di e inspeccion, enberdad a resulta cu e OK tin problema. “Mester renoba y no tin choice. E ta un mal noticia pasobra e ta un gasto cu bo no a premira” e mandatario a sigui bisa. Mes momento, e mandatario a bisa si, cu tin un ‘buffer’ cu ta permiti e parti extra di e OK nobo. “Pero no mas cu esey, sino bo tin cu bay Parlamento pa aproba un aumento di presupuesto”.

MEDIRISK

E otro banda ta e problema di seguro, cu a bisa cu OK no ta bon y cu si no renoba esaki, e compania di seguro (MediRisk) ta para e seguro di esaki. “E ta logico” e mandatario a bisa riba e posibel paro di seguro. E critica politico, esta cu ta usando un compania cu ta costando mas placa cu otro, segun e mandatario no ta na su lugar pasobra simplemente no tabatin destaho publico pues no por sa ken a bid mas cu e otro. Esaki aunke cu tin informacion cu lo tabatin companianan cu lo a ‘bid’ mas hopi. Normalmente enberdad tin un destaho publico, y sigur pa un proyecto nobo manera esun di hospital. Ley ta prescribi esey segun e mandatario. E ta un proceso largo si, cu ta e problema awor ya cu no tabatin tempo pa warda e destaho publico tuma lugar. “Door cu MediRisk a pone un druk riba nos, bisando nos cu eigenlijk e OK mester ta cla e aña aki caba, bo no por afford di haci un destaho publico” Schwengle a bisa. E ta lamenta cu no tabatin e destaho ya cu eynan por a saca un beneficio mas miho pa pais Aruba. “E ruimte ey, qua tempo, mi no ta haye di MediRisk. E compania a stipula pues cu mester haci e cos aki awo. Sino bo no ta haya seguro”. Y e mandatario ta sigura cu si para e seguro, OK ta sera (cu tur su consecuencia cu esaki por tin pa pais Aruba). A puntra e mandatario pakico no ta busca otro seguro, mirando cu esun actual ta poniendo e hospital, lomba contra muraya. Riba esaki e mandatario a bisa cu nos mester ta hopi contento caba cu nos tin e seguro aki caba via MediRisk. “ Nos por haya un otro seguro probablemente, pero nos lo ta pagando substancialmente hopi mas placa. Y cualkier compania di seguro lo a bisa nos pa nos cambia e OK anyway” e mandatario a sigura.

EXPERTO DI PLACA Y MANEHO

Despues ta sigui cu e parti di construccion y scohe e partner ‘nobo of no’ cu tin e suficiente experticio y cu a presta su mes caba den pasado. Den board di hospital, tin dos persona experto pa loke ta maneho cu a sugeri cu no por desvia di un partner di construccion, pasobra bo proceso primario ta bay core peliger. “Esaki den sentido di experiencia di hendenan den bouw”. A splica cu si introduci un otro partner di construccion, ta trece tardansa y problema cu por costa pais Aruba miyones. Riba esaki e mandatario a confirma tambe cu tabatin sugerencia cu lo tin un ‘partner’ mas barata. Pero e (partner aki) a wordo acerca pa hospital mes, sin consulta cu otro instancia manera banco y SOGA cu ta doño di e edificio. “Nan no a haci un destaho publico tampoco (hospital) , como tal no por bisa si e partner aki enberdad ta uno mas barata of no. Nan cifranan no a wordo controla tampoco”. E mandatario a mustra cu e no kier mete tampoco pasobra e no ta doño di e edificio. E ta simplemente (como gobierno), huur e edificio. Ta SOGA su responsabilidad riba e asunto aki. Mirando tur esaki a dicidi pa scohe e partner cu tey caba, esta Bermello pa continua cu e parti aki. Pesey e grupo aki ta envolvi den e asunto aki tambe.

CASO CIVIL

Minister Schwengle a reta mes momento tambe cu no tin algo illegal a tuma lugar. “I don’t think so. Si cualkier hende, ciudadano kier cuminsa un caso civil, pasobra e tin prueba convincente cu nos a haci un fout, please bin dilanti. Pasobra ami tambe lo kier wak e pruebanan ey” e mandatario a sigura NoticiaCla.com. Pero e no ta wak e. Y e la hiba e proyecto aki completamente transparante aunke no a bay prensa cu e asunto aki ainda. E mandatario a admiti cu NoticiaCla.com ta prome cu ta sacando e informacion aki. A bay di acuerdo pa duna informacion awor, aunke e asunto no ta completamente cla ainda. E grupo aki mester convence tambe cu e proceso cu nan ta bay haci, ta uno transparente, esta e verbouwing. Ta negoshando ainda y e prijs ainda no ta completamente estableci. “Pues mi no sa na unda cierto politico ta saca nan informacion”, e mandatario a finalisa bisando.