Alto Comisario Tjon tin cu baha di funcion pa su casa bira minister

ORANJESTAD – Awe ta cumpleaños di Alto comisario di polis Vanessa Tjon Kock. Pero loke porta no por considera como un regalo pe, ta e declaracion cu prome minister Evelyn Wever Croes a haci awe, cu sra Tjon tin cu traha caminda pa otro Alto Comisario, pasobra su casa Rocco Tjon ta bira e proximo minister di husticia. Y kier evita tur creencia cu lo tin conflicto di interes. Esey kier men cu sra Tjon tin cu baha pa otro hende bin na su lugar. 

POSICION TEMPORAL

Pero loke a hala atencion ta cu esaki ta ‘temporal’, den sentido cu e ta pa ‘duracion di gabinete Wever Croes II”. No ta sigur si esaki kier men cu si e gabinete aki no ta existi mas, cu sra Tjon ta haya su posicion sin mas. Un gabinete normalmente ta dura 4 aña, cu ta e periodo di un parlamento eligi. E posicion di sra Tjon, lo mester bay ‘on hold’ temporalmente e ora, pa ora cu e gabinete no tey mas, e por bolbe. 

MANEHO

Cu e cambio aki, Aruba ta haya otro hefe maximo di polis, y cu esaki, e consecuencia cu lo por tin henter un otro maneho di polis. Tabata aña pasa cu debi na un fayo interno, Alto comisario di polis e tempo ey Andrew Hoo mester a baha, cu a traha caminda pa actual Alto Comisario Vanessa Tjon Kock. E tin algo mas cu un aña den e funcion, y awor e tambe tin cu baha, pa traha lugar pa un otro. No ta conoci ki funcion ‘temporal’ e lo haya y si despues e por bin bek como Alto Comisario di polis.