Proceso pa formalisa nombracion di ministernan nobo ta continua

ORANJESTAD – Awor cu e nomber di ministernan di gabinete Wever Croes II ta conoci, e proceso ta sigui. Asina gabinete di Gobernador a informa diahuebs merdia. Segun e proceso, e conseho di minister nobo, di acuerdo cu e Reglanan di Procedemento di Conseho di Minister, lo dicidi tocante e proposicion na Gobernador encuanto nombramento di e Minister Plenipotenciario na Hulanda.

Despues cu ofrece e proyecto di e decreto nacional pa retiro di e ministernan actual y nombramento di e ministernan nobo na Gobernador, Gobernador lo puntra presidente di Parlamento pa inform’e mas pronto cu ta posibel tocante e decision di Parlamento relaciona cu e retironan y e nombramentonan propone pa e ministernan. Si for di Parlamento no tin obhecion contra e proposito di Gobernador, por retira e ministernan actual y por nombra y huramenta e ministernan nobo. E fecha di e huramentacion ainda no ta conoci.

Potret: © Kabinet Gouverneur Aruba