Bonaire a surpasa 100 caso activo di Covid19, pero no mester ahusta medida

KRALENDIJK – E cifranan di Covid19 na Bonaire a cuminsa subi drasticamente atrobe e ultimo dos simanan. Den apenas 9 dia, e isla a conoce un aumento di 89 caso, cu pa e isla di flamingo ta hopi. Te cu awe diahuebs, tin 102 caso activo di Covid19. E luna a cuminsa cu 13 caso y un aumento leve di 2 pa 3 pa dia. Apenas un dia despues, esaki subi pa 7 caso positivo pa dia, y esaki a keda aumenta te cu 4 dia despues esaki a yega 13 caso pa dia. Diahuebs e cantidad di caso positivo riba un dia a yega 22. No obstante e cifranan drastico aki, e isla lo no aumenta su medidanan, debi cu e ta considera e situacion bou di control. Tin tres diferente brote cu nan sa unda esaki a sosode. Esaki ta varia entre ekipo di baseball cu a contra e virus den exterior y dos scol cu tambe tin alumno cu a contra e virus pa cual mester a pone e klasnan bou di cuarentena. Hospital tambe ta bou di control cu ‘apenas’ 1 persona hospitalisa.