Pashentnan di Covid19 pa Colombia a costa AZV 3 miyon florin

ORANJESTAD – Den un periodo di algo mas cu un luna, AZV a traslata 30 pashent (asegurado) pa Colombia pa tratamento di Covid19. Esaki a costa AZV algo mas cu 3 miyon florin (te cu awor). Asina director di AZV Edwin Jacobs a confirma pa noticiacla diahuebs. “ Nos ta calcula cu el a costa AZV 3.1 miyon florin” Jacos a confirma pa e portal. Segun e director, a manda 30 asegurado pa Colombia, di cual 24 ainda ta na bida y lamentablemente 6 a fayece. E periodo den cual a manda e personanan ta entre 5 di augustus, pa ayera 8 di September.  

ESPACIO

Manera ta conoci, luna pasa AZV a cuminsa manda pashentnan interna den ICU cu Covid19 pa Colombia, pa asina alivia e ICU na Aruba, debi cu e capacidad local ta(bata) hopi limita. Y mirando cu no kier a yega na e situacion unda cu mester declara codigo preto (dicidi ken ta biba y ken no), a tuma e decision pa cuminsa panda hende pa Colombia pa asina alivia hospital di Aruba. Mientras cu tin e posibilidad aki, tabata conoci cu e no ta algo ‘barata’. For di inicio caba, Jacobs a confirma pa e portal aki cu cada biahe tabata costa AZV por lo menos 50 mil florin. Esaki ta entre e biahe (25 mil florin pa cada ambulance flight) y e estadia di mas of menos 30 dia cu ta un otro 23 pa 25 mil florin mas of menos. Mirando e situacion y e gastonan y cu e cantidad di pashent tabata aumenta, a dicidi di cuminsa combina buelo pa limita e gasto. Esey a pone cu dado momento tabata pone dos pa tres pashent riba un buelo, y asina mes tabatin dia cu tabatin 3 buelo pa Colombia. Y esaki lo por sigui, tanten cu Colombia tin espacio. Ora cu a puntra prome minister recientemente, si no tin miedo cu e placa por caba na AZV, e la bisa cu e ta spera cu nunca no tin cu tuma e decision di no manda hende, pasobra no tin placa. E director di AZV no kier a bisa aworaki, kico ta e alcanse ainda di e organo di seguro medico, esta cu cuanto nan por afford ainda di manda mirando e gastonan. 

CAft

Ta conoci, manera e portal a raporta e siman aki ainda, cu como si fuera poco, Hulanda y CAft tin wowo riba e forma con nos gastonan medico ta wordo maneha. Particularmente na AZV unda cu CAft no ta nada contento cu Aruba lo no ta cumpliendo cu e 60 miyon na reduccion pa aña, sino cu a sugeri 40 miyon ‘so’, mientras cu segun CAft su calculacion y informacion, e suma ta menos ainda (supuestamente 36 miyon). No ta conoci si e placa cu ta gastando pa Colombia, ta come di e ‘besparing’ aki tampoco. Den un otro raportahe di e portal aki, e mandatario demisionario di Salud ta reacciona riba CAft su ponencia.