Elmar y Gobierno a firma pa cambia tur luz di caya pa tipo LED

ORANJESTAD – E compania di utilidad Elmar a firma awe mainta un acuerdo cu gobierno di Aruba pa e ‘openbare straatverlichting’. Pa basta tempo ta purbando pa cambia e iluminacion di cayanan, y awor a yega tempo pa haci’e pa Aruba completo. E ta un contracto nobo cu ta refleha un cambio, y ta traduci den 12 mil lampi (9 mil existente ta den e forma HPL ) cambia pa e sistema LED, y un adicional 3 mil lampi, di cual tin algo mas di mil instala caba. “E ta sigur un señal fuerte den Caribe cu Aruba ta e direccion inovativo pero tambe cu e ta spaar coriente” director di Elmar, Robert Henriquez a bisa. E trabou lo dura mas of menos 2 aña pa instala. E costonan ta core pa cuenta di Elmar, cu ta buscando financiamento internacional pa esaki. Despues lo cobra gobierno esaki bek den forma di pago di coriente.