Studiante di 15 aña na Corsou: ‘Polisnan a pone mi kita sunu y buk nan dilanti’

WILLEMSTAD - Polis ayera a tene kontròl na un skol di VSBO kaminda a kita algun hóben sunú, manera nan a bisa pa chekeo mas riguroso. E kontròl sinembargo, di e forma ku el a bai, parse no ta ku konsentimentu ni di dosentenan i ménos di mayornan di e alumnonan ku ta menor di edat.

Un di e studiantenan ku a pasa den e kontròl bergonsoso aki, un hóben di 15 aña ku ta bishitá Marnix VSBO na Cas Cora, a konta redakshon di EXTRA su eksperensia amargo. E hóben a indiká ku mainta e polisnan a yega skol i a indiká ku lo tene un kontròl riba arma i droga. A kuminsá kontrolá tur mucha den kada klas miéntras ku tambe a kontrolá den nan tas di skol. Henter e skol ku ta konsistí di algu mas ku 500 alumno mester a pasa den e kontròl aki. E hóben a sigui bisa EXTRA ku despues ku a kontrolá tur mucha den kada klas, a saka algun mucha for di kada un di e klasnan i a bai den un área separá ku nan.

Einan tabata hinka e hóbennan  dos dos den e kamber di dosentenan, pa un kontròl mas riguroso. Promé ku esei, segun e studiante aki ta bisa EXTRA, na niun momentu a indiká na nan kiko lo bai tuma lugá den e kamber. Unabes ku e muchanan a pasa paden, e agentenan a indiká na nan ku nan mester kita nan paña kompletu. Pues ku otro palabra, e muchanan a keda blo sunú dilanti e agentenan i tambe dilanti e otro mucha ku a drenta den e kamber pareu. Ora ku nan a kita sunú, e agentenan a bisa nan pa bùk dos biaha.

Segun e alumno di 15 aña ku nos a papia kuné, e agentenan a bisa ku e parti di bùk tabata pa wak si algu lo kai. I komo esaki no tabata sufisiente, asta e hóben a keda ofendé pa e polisnan. Ta trata di un polis di fam R, ku den e kontròl a bisa e hóben di 15 aña ku ta yu di un fotógrafo di prensa tambe. “Abo ta Welvaart no?, kiermen abo ta yu di lancha, pues bo mester ta bende droga na skol”.  I miéntras e polis enkuestion tabata bis’é esei, e tabatin e kriatura na su krag di polo tene.

E hóben tur humiá a puntra e polis dikon a rank’é na su krag di e forma ei, pero no a haña kontesta. NOTA: Text skirbi den Papiamento fonetico di Corsou.