OM: Minister ta legalmente autorisa pa pospone of kita un VI si ta necesario

ORANJESTAD – E hecho cu un minister por ‘intermedia’ den un sentencia e siman aki, a hala hopi atencion. Ta trata di e caso di e homber Eugene Lampe actualmente deteni na KIA, cu a wordo nenga pa Hof pa su libertad condicional. Hof a bay di acuerdo cu e ‘intermediacion’ di minister di husticia y a nenga e libertad aki. Hopi (cu no conoce e posibilidad aki) a cuminsa cuestiona e supuesto ‘metemento’ aki. Pero mas despues Ministerio Publico mes a clarifica e hecho aki mas miho.

INTERMEDIACION DI MINISTER

Ministerio Publico a recorda tur hende ayera cu Minister di Husticia ta legalmente autoriza pa pospone of kita un VI si en caso hasta dor di pone condicionnan, e seguridad di otronan of e seguridad general di personanan no por wordo garantiza. Minister a pasa e autoridad aki pa Ministerio Publico. Corte Comun di Husticia a huzga recientemente cu e uso di e autoridad ey pa pospone e VI (pa motibo cu no  acumpli ainda cu e condicionnan especial pa garantiza seguridad di Lampe y di comunidad), ta razonable.  

CORTE COMUN

Manera ta conoci, Corte Comun di Husticia a recientemente trata e keho di e preso Lampe contra pospone su VI (voorwaardelijke invrijheidsstelling, libertad condicional) te 3 di november 2021. Corte Comun di Husticia a declara e keho sin base, loke kier meen cu Lampe lo mester keda den prison te e dia ey.

DETENI

Lampe ta den prison desde 2009. El a wordo condena na december 2009 pa asesinato triple riba 4 di april 2008. 

VI PA LAMPE?

Un preso cu a sinta dos tercer parti di su castigo incondicional, por bin na remarke pa wordo poni den libertad condicionalmente. Colegio Central di Reclassering a dicidi riba 20 di juli 2021 cu no tin contra-indicacionnan pa e VI di Lampe y a conseha pa pon’e den libertad bao condicionnan especial. Riba 29 di juli 2021 e Colegio a conseha Minister di Husticia pa pospone e fecha pa duna e team cu ta trata Lampe y Reclassering mas tempo pa por cumpli cu e condicionnan especial. A keda dicidi e ora pa pospone e VI di Lampe te 3 di november 2021. 

KICO TA PASA AWO?

Den e decision tuma den nomber di Minister, a keda poni cu KIA, e team cu ta trata L. y Reclassering lo sigui traha riba e plan di tratamento di Lampe y lo presente pa mas laat 15 di oktober 2021 na e Colegio. E Colegio lo bolbe saca un conseho na Minister tocante e fecha di VI di Lampe.