Hulanda ta gana di Turkia 6-1 y ta lidera su grupo di cualificacion pa Qatar

AMSTERDAM – Riba un forma hopi convincente, Hulanda diamars a hunga su miho wega contra Turkia den wega clasificatorio pa Qatar 2022. Un wega cu tin hopi fanaticada tanto na Aruba como na Corsou y cu ta pone cu hopi ta wak e weganan aki.  Cu un victoria di 6-1, e ta sigura e liderazgo den su grupo G. Aworaki Hulanda tin e control pa dicidi si nan ta cualifica finalmente pa e Copa Mundial di otro anja. Esaki tabata e di 3 wega pa e coach ‘nobo’ Louis van Gaal cu apenas algun siman pasa a bolbe como e director tecnico di e seleccion. Den su prome salida, Hulanda a hunga pareu cu Noruega cu score di 1-1, sigui pa un victoria contra Montenegro y finalmente awe un victoria aplastante contra Turkia. E siguiente wega ta dia 8 di october contra Letonia y 11 di october contra Gibraltar.