Ex minister Schotte ta ‘admiti’ cu e sentencia di awe no ta facil

WILLEMSTAD – E ex prome minister di Corsou Gerrit Schotte no ta considera e sentencia di awe contra dje, como algo facil. E hecho cu Corte di Casacion a dicta cu e mester paga 1.8 miyon bek na Ministerio Publico, y e decision ey ta final. Por lo menos, esey por saca for di su palabranan awe, den terminologia y analisis religioso. E no ta haci mencion di e caso, pero por compronde cu e ta referi si na e caso. “Ta facil ? No, e no ta facil” e ex mandatario ta skibi riba su pagina personal di Facebook. Y un biaha mas su fe ta prevalece atrobe “ Ta mi Fe cu un dia husticiadivino lo preevalece ta locual ta mantene mi riba mi pia” Schotte ta sigui bisa. For di momento cu el a sali di prizon anja pasa november, tabata notable cu e ex mandatario a bira un religioso ferviente y ta te hasta bisa cu e ta un pastoor awor. 

SU OBSERVACION 

Schotte, ta sigui papia di e caso den un forma biblico.” No keda sorpresa di haña gigantenan riba bo kaminda: mas opstaculo, mas desapunto”. Y pa esnan cu ta puntra con e ta sinti su mes y con e ta maneha e situacion actual, tambe e tin contesta: “Ami ta sigui mantene mi Fe, awe mi ta brasa mi tormenta di awe, i mi ta sigui kere”. Cu e ta pagando un prijs halto, e ta na altura, pero aki tambe e ta mustra cu sentimento religioso ta tene trankil awor.”  E prijs cu mi a paga ta nada compara cu e prijs cu Hesus a paga pa mi salvashon. Pesey mi por keda trankil, i mi ta yame danki, e so tin solushon pa tur cos, i su boluntad lo guiami i instrui mi. Mi ta confia den dje i solamente den dje” e ex mandatario ta finalisa bisando. No ta conoci si e lo paga e suma of si e lo mester bolbe prizon.