CAft ta insisti cu AZV mester spaar 60 miyon pa 2021 manera palabra!

DEN HAAG/ ORANJESTAD – E colegio di supervision financiero di Aruba CAft ta insisti cu gobierno mester reduci gastonan annual di AZV cu 60 miyon manera palabracion. Cu otro palabra, no por paga un suma menos manera e 40 miyon cu gobierno a informa CAft na augustus ultimo di lo paga. Esaki e colegio ta bisa den su reaccion recien riba e di dos UR (Raportahe di ehecucion di presupuesto 2021). Y asina mes cu e declaracion di gobierno (lesa: carta di minister demisionario Dangui Oduber), e falta un splicacion financiero di con e (lesa:gobierno) lo cumpli cu e ‘orden di spaarmento’.   De hecho, e colegio ta sigui bisa den su reaccion di 7 pagina, den e rapport di progreso di AZV, ‘ta resulta awor cu pa 2021 AZV ta sali di e punto di salida cu e spaarmento lo ta 36 miyon ‘so’. Pues te hasta menos. 

RECORDATORIO

E colegio ta subraya un biaha mas cu e reduccion palabra di 60 miyon mester keda realisa pa 2021 y cu mester tuma medida adicional. Ademas CAft ta pidi gobierno atencion pa implementar  e reformanan neceasario cu mester percura pa Aruba tin bon cuido y siguransa social garantisa pa futuro generacion tambe.  

ELOGIO

E rapporta no ta sin elogio si. E ta cuminsa na bisa cu e rapport di gobierno ta mustra cu e prome mitar di 2021 a realisa un deficit financiero di 363 miyon. E deficit financiero di e sector colectivo den su totalidad ta 50 miyon menos, y ta suma 313 debi na e resultado positivo di entidadnan otro. E deficit financiero premira di e sector colectivo pa henter e aña, segun e rapport ta 862 miyon florin, igual na 17% di e Producto Interno Bruto (PIB). CAft ta mira cu lo tin mas entrada y menos gasto den e ultimo dos cuartalnan. “Esaki debi na un recuperacion mas liher di economia, cu a spera. For di e presupuesto cu a keda concretisa dia 30 di juli ultimo, ta mira cu e estimacion di crecemento a keda actualisa y a keda aumenta di 5.6% pa 10.9%. Lesa e rapport completo AKI.