Hof a rechasa libertad condicional pa homber cu a mata su famia

ORANJESTAD – E homber cu a mata su famia completo algun aña pasa Eugene Lampe, no ta haya libertad condicional aworaki osea voorwaardelijke vrijheid (VI). Asina Hof a dicidi dialuna mainta den un veredicto di tres pagina. 

VI

Normalmente un detenido cu sinta su castigo, y comporta su mes bon, tin derecho riba libertad prome cu tempo, osea e VI cu ta reduci su castigo cu un tercera parti. Segun e sentencia di Lampe di 23 di December 2009, el a keda sentencia pa un castigo di 20 aña di prizon. Cu e VI, e lo por a sali pa dia 5 di augustus ultimo. Pero mirando cu e condicionan stipula pa su libertad no tabata cla ainda, minister di husticia pa decreto, a dicidi cu ta pospone e VI aki. E detenido (Lampe) a protesta contra esaki, cual caso a tuma lugar siman pasa dia 2 di september. 

E CASO

E motibonan duna pa suspende e VI temporalmente, tabatin varios punto. Entre nan e colegio pa reclassering (College) a conseha den un rapport e aña aki pa condiciona e libertad akin a un cantidad di condicion, cu ta pone cu pa 6 aña e persona en cuestion mester atene sum es na dje. Entre nan, tratamento di un psicologo y un psikiatra, y prome cu e libertad, haci palabracion concreto pa loke ta e instancianan cu tin cu controla Lampe riba su Vivienda, structura y resocialisacion. E ekipo a mustra cu ta mucho poco tempo pa por keda cla cu e preparacionan pa cu e fecha menciona di VI inicial. Y pesey a suplica pa prolonga esaki te ora cu e condicionan ta cla y ehecutable, y pa asina por garantisa e seguridad di personanan. E minister en cuestion a duna KIA y Reclassering te cu 1 di October proximo pa bin cu un plan di maneho. 

PUNTO DI PARTIDONAN

Den cuadro di esaki, Procurador General a opta pa no trata e reclamo di e detenido, te ora cu e rapport ta cla. Pero Hof a rechasa e peticion aki a base cu e ta considera cu e ta suficientemente informa pa por dicidi riba e keho di e detenido. E detenido na su turno, a protesta contra e suspension di su fecha di VI, y ta argumenta cu e proceso pa e condicionan pa cu su libertad a cuminsa mucho laat y e kier sali mas liher possible pa bay den un clinica psikiatrico unda cu e tin mas libertad. 

CONSIDERACION

Hof a considera tur aspecto y ta haya cu minister tabata rasonabel cu ehecucion di su autoridad legal y como tal , a dicidi contra e obhecion di Lampe y a rechasa e demanda. Por lesa e sentencia AKI.