Detencion awe den investigacion di asesinato di Poentje Castro

ORANJESTAD - E team investigativo a haci e prome detencion awe den investigacion di asesinato di Poentje Castro. Cu esaki e team ta considera di a detene un persona cu tabatin envolvimiento den e asesinato. Asina vocero di ministerio Publico Ann Angela a confirma dialuna merdia. E investigacion ta sigui full speed. No ta exclui cu lo sigui mas detencion.

E CASO 

Ya ta diez aña pasa cu Aruba a keda geshock dor di asesinato di periodista di television John Anthony ‘Poentje’ Castro. Te dia di awe no a detene ningun sospechoso pa e asesinato aki, te cu awe. Na April di e aña aki un team di Cuerpo Policial di Aruba, riba peticion di Ministerio Publico, a traha riba un revision (review) di e investigacion aki cu ta carga e nomber di “Apollo”. E revision a hiba na puntonan di referencia concreto pa mas investigacion, a base di cual a keda dicidi pa start e investigacion di nobo.

SCUCHA TESTIGO

Den e periodo cu a sigui, lo mester a dedica  na activamente scucha testigonan cu por aporta na soluciona e caso. Ademas Cuerpo Policial di Aruba y Ministerio Publico a bisa di tabata convenci cu tin hende cu tin conocimento di e caso, pero cu te ainda no a papia nada. Un yamada urgente a bay e ora na personanan cu tin conocimento tocante e asesinato di Poentje Castro, of cu sa kende(nan) a comete e asinato aki, pa meld nan mes. Por meld anonimamente via tiplijn 11141.