Tratamento caso ‘Hato’ mayan na K-Center enves di edificio di Corte

WLLEMSTAD – E tratamento di e caso HATO mayan y diaranson, no ta tuma lugar mas den e edificio di Corte di husticia na Punda, sino den e K-Center na Brievengat. Esaki a keda anuncia diadomingo pa Sigmar Carmelia, vocero di hues. Motibo di e cambio ta cu mester a atende cu asuntonan di seguridad extra pa e caso aki, cu ta stroba e edificio di corte funciona normalmente. Pa evita un asunto asina, a hala e caso completo pa un otro area, pa laga e edificio di corte sigui funciona normal.

CASO

E caso ta trata e asesinato aña pasa juli, di dos persona na aeropuerto Hato. Dos gang rival di otro, a tuma ley den nan mesun man unda cu na yegada di dos miembro di un gang, nan a keda asesina pa miembro di un otro gang. E hecho cu e la tuma lugar na aeropuerto, a causa conmocion grandi e tempo ey. E caso ta cuminsa tuma lugar riba tanto diamars (mayan) como diaranson.

 CARGO

Durante e caso, lo tin tres sospechoso cu tin cu presenta. Adrian ‘Venenu’ Martha, Judrin Martis y Raily Bart – tur miembro di e gang No Limit Soldiers (NLS) – cu riba 15 di juli aña pasa a tira miembronan di e gang di Buena Vista City- Jais Juliana y Shantley Arnhem mata. Dos di e 5 sospechosonan, - Givency Maria y Renaldo Martina – a duna declaracionnan incriminatorio riba e otronan. Como tal a pone nan dos den un otro area pa motibo di seguridad. E caso mes lo tin di haber cu un pleito entre e dos gangnan, pa 40 kilo di cocaina. E cargonan contra e sospechosonan ta complice di morto y intento di asesinado di 7 espectador y dos agente policial, banda di destruccion causa na Hato. Foto di archivo di e dia di e caso ta cortesia di José de Bruin, Caribisch Netwerk.