Hermans: Aruba no ta call the shots mescos cu Curacao, den caso di Covid19

ORANJESTAD – Aruba desde ayera nochi no tin Toque de Queda mas, e medida mas severo cu por impone pa un pais pa limita e libertad pa su ciudadanonan. A cancela esaki debi cu e situacion di e coronavirus, Covid19 ‘ta permiti esey awor’. Corsou di otro banda, nos isla bisiña, si a dicidi cu ta prolonga esaki cu 3 siman mas, siendo cu nan situacion ta mucho mas ‘miho cu Aruba’. E pregunta a surgi con e diferencia aki entre e dos islanan. “Correcto, Aruba no ta call the shots manera Curacao” ta un pensamento di miembro di crisis team y hefe di e departamento di calamidad Rino Hermans na Noticiacla, den sentido cu no ta pasobra Corsou a dicidi algo, Aruba tambe tin cu haci mescos.  

DATA DIFERENTE

Segun Hermans, Crisis Team Curacao lo tin su informacion y data cu a conduci nan pa tuma dicho dedicion pa prolonga TDQ.” TdQ ta un medidida hopi pisa, ta derechonan humano ancra den tratado. Na Aruba nos ta evalua y hustifica cada biaha cu introduci esaki” e ta sigui bisa. Corsou tin su motibonan y Aruba tin su motibonan pakico cos ta diferente aki, segun Hermans. Y cada uno ta pa nan responsabilidad. 

CARNAVAL Y ST KLAAS

Otro medida cu a wordo considera drastico mirando e tempo cu falta pa e eventonan, (Sinterklaas na November awor y carnaval na januari 2022) , esta cu a cancela marchanan di Carnaval di Corsou pa 2022 y yegada di Sinterklaas di e aña aki. Aki na Aruba ainda (manera noticiacla a raporta ayera) 

no tin un decision. “ Si, nos ta keda sinta cu SMAC pa keda plania e mihor manera considerando tur aspecto” Hermans a sigui bisa. Pa fin di otro siman pues, lo haya claridad riba e aspecto di Carnaval. Ayera minister di Cultura Xiomara Maduro y presidente di SMAC Jason Brown no tabata cla pa comenta riba e tema aki. 

DIFERENTE

No ta prome biaha cu decisionan ta diferente pa loke ta Aruba y Corsou. Esaki ta bin for di tempo di horcan unda cu Corsou ta tuma decisionan diferente y cu hopi biaha ta pone hende puntra na Aruba kico nan sa (Corsou) cu Aruba no sa. Entre otro, tabata habri shelternan prome, y Aruba nada. Y asina tabatin mas medida cu tabata diferencia entre e islanan. Pero cada bez tabata splica cu cada isla ta responsabel pa nan mes y ta tuma decision segun nan criteria. Y no ta pasobra un a tuma decision, e otro automaticamente mester tuma decision.

SOSTEN

Despues di e publicacion di e decision di Corsou ayera riba e varios medidanan, e portal aki a haya basta reaccion di cual mayoria tabata pro e decisionan di Corsou. Algun tabata puntra con bin no a haci mescos na Aruba, mientras cu otronan tabatin e speransa cu Aruba lo sigui despues cu e mesun medidanan aki.  Otronan a bisa cu tin cosnan mas importante pa dicidi awor, cu Carnaval y Sinterklaas. NOTA: Potret cortesia : BoObservador.com.