Articulo di BBC a enfoca riba Aruba y su team Paralimpico na Tokyo!

TOKYO – E portal di e organisacion noticioso mas grandi y importante di Gran Britania, Britisch Broadcasting Corporation (BBC) a duna Aruba un cobertura internacional gigantesco, publicando e storia di Aruba su team paralimpico den un articulo di 3000 palabra, completo cu varios potret di e ekipo. E enfoke di e escritor Beth Rose tabata pa enfoca riba e chef di mission di Aruba Shardea Arias De La Cruz-Croes, y e exito di atletanan paralimpico cu e isla a y ta produciendo. E articulo ta bin un dia prome cu Aruba su atleta paralimpico Elliott Loonstra ta prepara pa mira su prome accion diasabra mainta (ora di Tokyo). Segun Shardea, ta BBC a acerca su persona, el a bisa noticiacla diabierna mainta. 

E CONTENIDO

E contenido ta cubri henter e odisea di Shardea, for di tempo cu e tabata un studiante, cu e passion pa haci algo cu personanan cu un handicap, den deporte pa cual e tin un passion special. Mientras cu e articulo ta trata riba e bida y passion di Shardea, e ta duna Aruba un cobertura increibel y ta pone nos den e lus positivo pa loke ta e futuro posibilidad pa atletanan cu un handicap. E articulo ta describi Aruba como isla y tur loke e tin pa ofrece, fuera di e posibilidadnan Deportivo pa e deporte paralimpico. E prome atleta cu Shardea a busca y haya esta Jesus de Marchena Acevedo cu a participa na Rio na 2016, y awor Elliott Loonstra na Tokyo. Un articulo hopi largo, hopi detaya y cu ta tuma tempo pa siña conoce Shardea y Aruba. 

E ESCRITOR

Den un reaccion di e escritora na Shardea, el a confirma cu e articulo a haci su impacto y cu mas di 100 mil persona ya a lesa e articulo for di ora cu e la keda publica y cu e la bira un articulo hopi popular pa lesa riba e portal grandi aki. Pa lesa e articulo original, please click AKI.