Gobierno ni SMAC no a ‘dicidi’ ainda si carnaval di Aruba pa 2022 ta keda cancela

ORANJESTAD – Mientras cu na Corsou a anuncia diahuebs (awe) cu ta cancela Carnaval otro aña y Sinterklaas e aña aki, aki na Aruba e decision ey no a cay ainda. For di minister demisionario encarga cu Cultura Xiomara Maduro, el a bisa “Mi no tin reactie riba esaki” ora cu e portal aki noticiacla a acerca e mandatario pa un reaccion. Pa loke ta e presidente di SMAC, Jason Brown, e tampoco por a bisa mucho, sino cu solamente cu fin di otro siman, nan lo tin un reunion cu Crisis Team riba e tema ey. Ta corda cu a bisa cu pa October, lo mester por dicidi si e apertura di Carnaval riba 11 di November proximo por tuma lugar. Mientrastanto Corsou a dicidi caba, y a bisa cu no ta bay gasta placa na ni Carnaval ni Sinterklaas. A papia si di e marchanan di carnaval, cu de hecho ta e parti principal di carnaval. Pues, Aruba tin cu warda un poco mas pa tende kico finalmente ta bira e decision. E aña aki a cancela carnaval debi na e situacion di e pandemia, y tabatin e speransa cu pa 2022 e situacion lo a bira menos y cu por a celebra e fiesta mas grandi di Aruba. Pero no a conta cu e yegada brutal di e variante di coronavirus esta Delta.