Maduro: Ta warda gobierno nobo forma pa finalisa prespuesto 2022

ORANJESTAD – Conforme ley di contabilidad, gobierno mester entrega su presupuesto di e pais di e aña siguiente, riba 1 di september di e aña anterior. Manera por a spera, esaki no a sosode atrobe. E tabata di spera mirando cu Aruba tin un gobierno demisionario y cu ta den pleno formacion di gobierno nobo. Riba pregunta di noticiacla, e minister demisionario di Finanzas Xiomara Maduro a confirma cu ta wardando e gobierno nobo sinta, pa por finalisa e prespuesto 2022. 

E DESAROYO

Segun e mandatario demisionario, no a keda keto si riba e fecha ey, sino mas bien a reuni cu e departamentonan concerni. “ Ayera mi a sinta cu Departamento di Finansa riba presupuesto 2022. Nos a repasa e targetnan pa locual ta, entre otro, e nivel di deficit, gastonan di personal, inversion y tambe pa locual ta regarda e acuerdonan cu Hulanda” e mandatario a bisa. “Nos ta warda pa e Gobierno nobo por forma pa asina por finalisa e proceso presupuestario di nos Pais”, e mandatario a finalisa bisando. 

CAFT

Tabata algun luna atras ainda durante e ultimo bishita di e colegio di supervision financiero CAFT cu a trata e tema aki. Riba pregunta di e portal aki, cu si ta duna un tempo extra mirando e situacion actual, esta cu tin formacion di gobierno, y cu tin un gobierno demisionario, e colegio no a mustra tolerancia. “Hulanda tambe ta den formacion di gobierno y tambe tin un gobierno demisionario, pero ey ta sigui traha riba presupuesto” Raymond Gradus a bisa na tal occasion, indicando cu e situacion cu Aruba ta aden, no mester ta un excusa pa no entrega e prespuesto na tempo. “E tempo pa excusa a pasa!” tabata palabra cla di e presidente di e colegio.