Baly: Scolnan di SKOA lo habri bek diahuebs mainta toch!

ORANJESTAD – Tur e 46 scolnan cu ta cay bou di Stichting Katholiek Onderwijs Aruba (SKOA), ta habri diahuebs atrobe. E director, sra Anuesca Baly a confirma esaki diaranson atardi pa noticiacla. Segun sra Baly, despues di tur loke a pasa, a cuminsa un dialogo cu mediador di gobierno, sr Anselmo Pontilius, y basa riba e desaroyonan, a dicidi cu ta habri scolnan toch. “Nos ta den dialogo” sra Baly a bisa den un reaccion cortico. Awe mainta y den curso di dia ainda, manera cu e portal aki a raporta extensamente, tabatin un impasse basta serio entre gobierno y SKOA. Te na ultimo ainda diaranson atardi, prome minister di Aruba Evelyn Wever Croes a reacciona riba e situacion y cu a mustra cu no por a compronde e actitud di SKOA. Awor cos ta mustra di ta drechando y lo importante ta cu scol ta habri mayan pa 9500 alumno tambe. E problema ta e pago di trahadonan di limpiesa, cual pago gobierno lo mester yuda cu ne debi cu SKOA no tin e placa aki.